(இ - ள்.) இனையர்போல் - இந்தப் புலவர்கள்போலவே,
மறுபுலத்து இருக்கும் கேள்வி வினைஞரும் - வேற்று நாட்டிலுள்ள
நூற்கேள்வி வல்ல புலவர்களும் வந்து வந்து மதம் மேற்கொண்டு வினாய்
வினாய் வாதம் செய்து - வந்து வந்து தருக்கினை மேற்கொண்டு பலமுறை
வினாவி வாதித்து, மனவலி இளைப்ப - மனத்தின் திட்பங்கெட, வென்று -
(அவர்களை) வென்று, வைகுவோர் - தங்கி யிருக்கும் அக்கழகத்தார்,
ஒன்றை வேண்டி - ஒரு பொருளைக் கருதி, புனை இழை பாகம் நீங்காப்
புலவர்முன் நண்ணினார் - உமையம்மையை இடப்பாகத்தில் நீங்காத
புலவராகிய சோமசுந்தரக்கடவுள் திருமுன் சென்றனர். ஈண்டும் அடுக்குகள்
அப்பொருளன. நூற்கேள்வியே தொழிலாகவுடைய ரென்பார் ‘கேள்வி
வினைஞரும்’ என்றார். மதம் மேற்கொண்டு என்பதற்கு உடன்படல் முதலிய
எழுவகை மதத்தினை மேற்கொண்டு என்றுரைத்தலுமாம். வினாவி என்பது
விகாரமாயிற்று. ஒன்று : பண்பாகு பெயர். புனையிழை அணியப்பட்ட
அணியினையுடையாள் : அன்மொழித்தொகை. (22)

      (இ - ள்.) முந்துநூல் மொழிந்தார் தம்மை - முதனூலாகிய
வேதாகமங்களை அருளிச்செய்த இறைவனை, முறைமையால் வணங்கி -
முறைப்படி வணங்கி, எம்மை வரிசையாக வந்து வந்து எவரும் வாதம்
செய்கின்றார் - எம்மோடு தொடர்ச்சியாக வந்து வந்து எவரும்
வாதிக்கின்றனர்; அந்தம் இல் புலமை தூக்கி அளப்பதா - (ஆதலால்)
முடிவில்லாத புலமையைச் சீர்தூக்கி அளக்குங் கருவியாக, எம்மனோர்க்கு
- எமக்கு, சங்கப்பலகை ஒன்று தந்தருள் செய்தி என்று தாழ்ந்தார் - ஒரு
சங்கப் பலகை அளித்தருளுவாயாக என்று வேண்டி வணங்கினார். முந்துநூல்
- தமிழ் இலக்கண முதனூலுமாம்;

என்பதுங் காண்க. வரிசையாக - இடையறாது என்றபடி. (23)