(இ - ள்.) ஆறினோடு இரண்டு அடுத்த ஆயிரம் சமணரும் - ஆறு
என்னும் எண்ணுடன் இரண்டு சேர்ந்த ஆயிரம் (எண்ணாயிரம்) சமணரும்,
வேறு வேறு தாம் முயன்ற மந்திரங்கள் - தாம் முயன்று கற்ற வேறு வேறு
மந்திரங்களை, ஊறு நீர் சுரந்த வேறு வேறு ஓலையில் பொறித்து -
ஊறுகின்ற நீர் சுரந்த வெவ்வேறாகிய ஓலையில் எழுதி, ஒருங்கு போய் ஒரு
சேரச் சென்று, சீறிவான் நிமிர்ந்து எழுந்த தீயின் வாய் நிரப்பினார் - சினந்து
வானின் கண் ஓங்கி யெழுந்த அனலின்கண் நிரப்பினார்கள்.

     முயன்ற - முயன்று பயின்ற. நீர் சுரந்த வோலை - சிறிதும் நீர் வற்றாத
பச்சோலை. வேறு வேறு ஓலையில் என்க. எண்ணிறந்த மந்திரங்களை
எண்ணிறந்த ஓலையிற் பொறித்து எண்ணிறந்தோர் ஒருங்கு சென்று தீயிற்
போகட்டனர் என்றார். (37)

     (இ - ள்.) அக்கிவாய் மடுத்த ஏடு அனைத்தும் - அவ்வனல் வாய்
மடுத்த ஏடு முற்றும், அக்கணத்தினே - அந்தக் கணப்பொழுதிலேயே,
இக்குவாய் உலர்ந்த தோடெனக் கரிந்து சாம்பராய் - கரும்பிலுள்ள காய்ந்த
தோட்டைப்போலக் கரிந்து சாம்பராகி, உக்கவாறு கண்டு - அழிந்த
தன்மையைக் கண்டு, நீசர் உள் கிடந்து பொங்க - புலையர்களாகிய
அச்சணமரது உள்ளம் புழுங்கிப் பொங்க, திக்குளார்கள் கண்டபேர் -
அதனைக் கண்டவர்களாகிய அத்திசையிலுள்ளாரனைவரும், சிரித்துளார்கள்
ஆயினார் - சிரிப்பார்களாயினர்.

     அங்கி எனற்பாலது அக்கி என வலித்தது; அக்கினி என்பதன் கடைக்
குறையுமாம். கரும்பின் உலர்ந்ததோடு நெருப்பிலிட்டாற் கரிதல் போன்று
என்க. கண்டபேர் - கண்டவர்; வழக்குப் பற்றி வந்தது; சிரித்துளார்கள் -
சிரித்தவர்கள், சிரிப்பவர்கள். (38)