(இ - ள்.) ஆளுடைப் புகலி வேந்தர் - தம்மை ஆளாகவுடைய காழி
வேந்தரின், அருள் மொழி மறுக்க அஞ்சி - அருள் நிரம்பிய மொழியினை
மறுப்பதற்கு அஞ்சி, தாள் உடைப் பதுமச் செந்தாள் தலையுறப் பணிந்து -
தண்டையுடைய தாமரை மலர்போன்ற சிவந்த திருவடிகள் தலையிற்
பொருந்துமாறு வணங்கி, வாள் உடைத் தானைத் தென்னன் மீண்டு
மதுரையில் வந்தான் - வாட்படை ஏந்திய தானையை யுடைய பாண்டியன்
திரும்பி மதுரைப் பதியை யடைந்தான்; கஞ்சத் தோள் உடைச் சிங்கம்
அன்னார் - தாமரை மாலையை யணிந்த தோளையுடைய சிங்கம்
போல்வாராகிய பிள்ளையார், சோழர்கோன் நாடு புக்கார் - சோழர்
மன்னனது நாட்டினுட் புகுந்தனர்.

     ஆளுடைப் புகலிவேந்தர் - ஆளுடைய பிள்ளையார்
என்றுரைத்தலுமாம். அருள் மொழி - ஆணை, தோளையுடையதொரு
சிங்கம்போல்வார் எனக்கொண்டு இல்பொருளுவமை யாக்கலுமாம். (80)

     (இ - ள்.) ஞானமாம் மதநீர் சோர - ஞானமாகிய மதநீர் ஒழுக,
ஞானசம்பந்தர் என்னும் மானம் மாயானை வந்து - ஞானசம்பந்தராகிய
சிறந்த பெரிய யானை சமணர் என்னும் தருக்களை ஒடித்து - குற்றமுடைய
சமணராகிய மரங்களை ஒடித்து, வெண்ணீறு ஆன மாப் பூழி அள்ளி -
திருநீறாகிய சிறந்த பூழியை வாரி, அவனி யெங்கும் தூற்றியது -
உலகமுற்றும் தூற்றியது.

     புவி முழுதும் திருநீறு விளங்கச் செய்தன ரென்பார் 'வெண்ணீறான
பூழி யள்ளித் தூற்றிய தவனி யெங்கும்' என்றார். இது மிகை குறையின்றி
வந்த ஒற்றுமை யுருவகவணி. (81)

     (இ - ள்.) ஆதி ஆலயத்து அடலை கொண்டு - முதற்கடவுளாகிய
சோமசுந்தரப் பெருமான் திருக்கோயிற் சாம்பலினால், ஆழிசூழ் காழிச்சோதி
வேதியர் - கடல் சூழ்ந்த காழியில் அவதரித்த புகழொளியினையுடைய
மறையவராகிய பிள்ளையார், பாண்டியன் சுரந்தணிந்து - பாண்டியன் வெப்பு
நோயை நீக்கி, உடலில் பேதியாத கூன் நிமிர்த்தலால் - உடலில் மாறுபடாத