(இ - ள்.) அந்நிலை - அப்பொழுது, இளையாள் கேள்வன் அடியில்
வீழ்ந்து இரப்பாள் - இளையவள் நாயகன் திருவடியில் வீழ்ந்து இரந்து
வேண்டுவாள்; ஐய - ஐயனே, இவள் என்னது கற்பை இன்று நிறுத்தினாள் -
இவள் என்னுடைய கற்பை இன்று நிலைநிறுத்தினாள்; மாற்றாள் அன்று -
(ஆகையால் இவள் எனக்கு) மாற்றா ளல்லள்; அன்னை இலாதேற்கு
அன்னை ஆயினாள் - அன்னை இல்லாத எனக்கு அன்னையாயினாள்;
இவளும் யானும் இன் உயிர் உடல்போல் வாழ்வோம் என - இனி இவளும்
யானும் இனிய உயிரும் உடலும் போலப் பிரிவின்றி வாழ்வோமென்று கூறி,
தம்மில் தழீஇ நட்டார் - தங்களுள் ஒருவரை யொருவர் தழுவி நட்புப்
பூண்டனர்.

     நிறுத்தினா ளாகலின் மாற்றாளல்லள் அன்னையாயினாள் என்.க
என்னது, னகரம் விரித்தல். (50)

     (இ - ள்.) இருவரும் - அவ்விருவரும், உடம்பினால் இரண்டே அன்றி
- உடலினா லிரண்டே யல்லாமல், உயிர்ப் பொருள் இரண்டு அற்று - உயிர்ப்
பொருளால் இரண்டாகாமல், உள்ளம் மடம்படும் அழுக்காறு அற்று -
உள்ளத்தின்கண் அறியாமையால் உண்டாகும் பொறாமை யின்றி, மைந்தரும்
அனையராக - புதல்வர்களும் அத்தன்மையரேயாக, விடம்படும் ஐவாய்
நாகம் விழுங்கு இரை ஒத்து - நஞ்சினையுடைய ஐந்தலைப் பாம்பு விழுங்கும்
இரையைப்போன்று, தம்மில் இடம்படும் அன்புற்று இன்புற்று இருந்தார் -
தங்களுள் மிகுந்த அன்பினைப் பொருந்தி இன்பமெய்தி இருந்தனர்.

     உயிர்ப் பொருள் - உயிராகிய பொருள். ஐவாய் நாகம் ஐந்து
வாயாலும் இரை விழுங்கினும் அஃது ஐ வேறு பாம்பாகாமை போல
இவர்களும் இருவேறு உடலினராயினும் அன்பால் இருவராகாதிருந்தனர்
என்றார். இடம்படும் - அகன்ற. மன், ஓ அசைகள். (51)

     (இ - ள்.) அருந்ததி அனையாள் - அருந்ததி போன்றாளாகிய
அவ்விளைய நங்கை, கேள்வதற்கு ஆயுளும் ஆனாச் செல்வப் பெருந்தன
நிறைவும் - தனது நாயகனுக்கு வாணாளும் நீங்காத பொருட் செல்வ
நிறைவும், சீரும் ஒழுக்கமும் பீடும் - சிறப்பும் ஒழுக்கமும் பெருமையும்,
பேறு தரும் தவநெறியும் - பயன் தரும் தவ வொழுக்க