என்னும் காஞ்சிப் புராணச் செய்யுளா னறிக. எண்ணி யாங்கே அடைய
என ஒரு சொல் விரித் துரைக்க. மலை - ஸ்ரீசைலம்; திருப்பருப்பதம். இது
மல்லிகார்ச்சுனம் என்னும் பெயரு முடைத்து. இது மூவர் தேவாரமும் பெற்ற
வடநாட்டுத் திருப்பதி. அடுக்கு உவகை பற்றியது; விரைவு பற்றியதுமாம். (11)

     (இ - ள்.) சுரபி நீள் செவி சுடர் இலிங்க உருவாயினான்றன்
இரவினில் - பசுவினது நீண்ட காதைப்போல ஒளியினையுடைய இலிங்க
வடிவாகிய இறைவனது சிவ நிசியில், திருத்தேர் மன்றல் நடக்கும் ஊர்
இவ்வூர் - திருத்தேர் விழா நடக்கும் திருக்கோகரணம் இத் திருப்பதியாம்;
மேலை உரவு நீர்க்கரை - மேலைக் கடற்கரையில், தேள் மாதத்து உயர்ந்த
கார்த்திகையில் - கார்த்திகைத் திங்களில் சிறந்த கார்த்திகை நாளில்,
அரவுநீர்ச் சடையான் தேர் ஊர்ந்து - பாம்பையுங் கங்கையையு மணிந்த
சிவ பெருமான் தேரில் ஏறியருள, வேள்வி நடக்கும் ஊர் அவ்வூர் -
திருவிழா நடக்கும் திருவஞ்சைக்களம் அத் திருப்பதியாம்; காண்மின் -
பாருங்கள்.

     சுரபி நீள் செவி - ஆனின் நெடிய காது; கோகர்ணம். இராவணன்
இலங்கையில் நிறுவுமாறு சிவபிரான்பாற் பெற்றுக் கொணர்ந்த சிவலிங்கத்தை
வானோர் வேண்டுகோளின்படி விநாயகர் வாங்கிக் கீழ்வைத்துப் பிரதிட்டை
செய்துவிடலும், இராவணன் அதனைப் பெயர்த் தெடுக்கத் தன்
ஆற்றல்கொண்டு இழுத்தகாலை அவ்விலிங்கம் பசுவி்ன் காதுபோற்
குழைந்தமையின் ‘கோகர்ணம்’ எனப் பெறுவதாயிற்று. சுடருருவாயினான்றன்
இரவு - மகா சிவராத்திரி. தேர் மன்றல் - இரதோற்சவம். இது
திருஞானசம்பந்தர், திருநாவுக்கரசர் ஆகிய இருவர் பாடல்பெற்ற துளுவ
நாட்டுத் திருப்பதி. உரவு நீர் - வலிய நீர்; கடல். தேள் மாதம் - விருச்சிக
ராசியில் ஆதித்தன் இருக்கும் கார்த்திகைத் திங்கள். உயர்ந்த கார்த்திகை -
கார்த்திகைத் திங்களில் வரும் திருக்கார்த்திகை. ஊர்ந்து என்பதை ஊர
எனத் திரிக்க. அஞ்சைக் களம் என்பது சுந்தரர் பாடல் பெற்ற மலைநாட்டுத்
திருப்பதி. வேள்வி நடக்கும் ஊர் சோமநாதம் என்பாரு முளர். (12)

     (இ - ள்.) வில்பயில் தடக்கைவேடன் மென்ற ஊன் - வில்லை
யேந்திய பெரிய கையையுடைய வேடர் குலத்தினராகிய கண்ணப்பர் மென்ற
ஊனினை, பாகம் பார்த்தோன் பொற்பு உறு கிரி ஈது - சுவை பார்த்த
இறைவன் எழுந்தருளிய அழகிய திருக்காளத்திமலை இது; அண்டம் புழைபட