(இ - ள்.) நீடும் தரங்கம் இரங்கும் நிறை நீர் நிலையே அன்றி -
நீண்ட அலைகள் ஒலிக்கும் நிறைந்த ஓடைகளே அல்லாமல், பாடும் சுரும்பு
உண் கழுநீர் பைந்தாள் குமுதம் பதுமம் - இசைபாடும் வண்டுகள் மது
உண்ணும் குவளையையும் பசிய தாளையுடைய ஆம்பலையும் தாமரையையும்,
கோடும் பூத்த என்ன - பூங்கொம்புகளும் பூத்தனபோல, கொடி ஏர்
இடையார் குழையும் தோடும் கிடந்த வதனத் தொகையால் - கொடி போன்ற
அழகிய இடையையுடைய மகளிரின் குண்டலமும் தோடும் பொருந்திய
முகங்களின் தொகுதியால், சோலை பொலிவ - சோலைகள் விளங்காநின்றன.

     நீரிற் பூத்தற்குரிய குவளை ஆம்பல் தாமரை என்பன கோட்டிற்
பூத்தாற் போல மகளிருடைய கண் வாய் முகம் என்பன விளங்கின வென்க.
குவளை முதலியவற்றைக் கோடு பூத்தவென்ன என்றது இல்பொருளுவமை.
(29)

     (இ - ள்.) கொழுநர் - கணவர்கள், பிடிகள் என்ன நடந்தாருடன்
போய் - பெண் யானைகள் போல நடந்த மகளிருடன் சென்று, பெருந்தண்
கொடிகள் மிடைந்த இல்லில் - பெரிய குளிர்ந்த கொடிகள் மிடைந்த
இல்லின்கண், இயக்கர் போலக் குறுகி - இயக்கர்கள் போலச் சார்ந்து, கடி
கொள் பனிநீர் தெளித்து வேடைதணித்தும் - மணங்கொண்ட
பனிநீரைத்தெளித்து வெம்மையை ஆற்றியும், கன்றும் அடிகள் பிடித்தும் -
நடத்தலாற் கன்றிய அவர்கள் அடிகளைப் பிடித்தும், சேடியர்கைக்கு
உதவியாவார் - தோழியர்களிள் கைகளுக்கு உதவி புரிவாராவர்.

     கொடிகள் மிடைந்தஇல் - இல்போன்று கொடிமிடைந்த இடம்; லதாக்
கிருஹம். சேடியர் செய்யும் பணியைத் தாம் செய்தலால் அவர்
கைக்குதவியாவார் என்றனர். (30)

     (இ - ள்.) மைவார்தடம் கண்மடவார் - மைதீட்டிய நீண்டபெரிய
கண்களை யுடையமகளிர், வளைப்பார் கொம்பின் மலரைக்கொய்வார் -
கொம்புகளை வளைத்து அவற்றின் மலர்களைக் கொய்து, குமிழ் மோந்து
உயிர்ப்பார் - குமிழம்பூப்போன்ற மூக்கில் மோந்து உயிர்த்து, குழையும்
செவியும் குழலும் பெய்வார் - குழைகளிலும் காதுகளிலும் கூந்தலிலும்
அணிந்து, மகிழ்ச்சி செய்வார் - (நாயகர்களுக்கு) மகிழ்ச்சியை
விளைப்பார்கள்; பேரா மையல் கூர - நீங்காத காமமயக்கம் மிக, எய்வார்