(இ - ள்.) இளம்பெடை மயில் அன்னாள் ஓர் மாதர் - இளமை
பொருந்திய பெண் மயில் போல்வாளாகிய ஒரு பெண், மாங்குடம்பை
செல்லும் இளங்குயிற் பெடை - மாமரத்திலுள்ள தனது கூட்டின் கட்
செல்லும் இளமையுடைய பெண் குயில், தன் ஆவிச்சேவலைக் கூவ -
தன் உயிர்போன்ற ஆண்குயிலைக் கூவி அழைக்க, நோக்கி - அதனைக்
கண்டு, அயில் இளங்களிறு அன்னானை - வேற்படை ஏந்திய மழயானை
போன்ற தன் காதலனை, கடைக்கணித்து - கடைக்கண்ணால் நோக்கி,
அளியும் தேனும் பயில் இளஞ்சோலை மாடு - ஆண் வண்டும் பெண்
வண்டும் பயிலும் இளமரக்காவின் மருங்கு, ஓர் மாதவிப் பந்தர் சேர்ந்தாள்
- ஒரு குருக்கத்திப் பந்தரை அடைந்தனள்.

     குயிற்பேடை சேவலைக் கூவிக் குடம்பை சென்றதனை நோக்கிய
வளவில் காதலனைக் கூடும் வேட்கை விஞ்சினமையின் தலைவற்குக்
குறிப்பா னுணர்த்தி மாதவிப்பந்த ரெய்தினாளென்க. கடைக்கணித்தல் -
கடைக்கண்ணோக்கால் கலவிக் குறிப்புணர்த்தல். நாணம் மகளிர்க்கு
இயல்பாய குணம் ஆகலின் வாயாற் கூறாளாயினாள். தன் ஆவி, ஆறாம்
வேற்றுமை ஒற்றுமைக் கிழமைப் பொருளில் வந்தது. கடைக்கணித்து,
பெயரடியாகப் பிறந்த இறந்தகால வினையெச்சம். பந்தர், போலி. (37)

     (இ - ள்.) பாசிழை ஒருத்தி - பசிய அணிகளை யணிந்த ஒரு பெண்,
ஆற்றாப் புலவியாள் - பொறாத புலவியையுடையவளாய், பைந்தாரான்முன் -
பசியமாலையை யணிந்த தலைவன் முன், பூசு அகில் வாசம் காலில்
போக்கியும் - பூசிய அகிலின் மணத்தைக் காற்றின் வழிச் செலுத்தியும்,
புனைபூண் காஞ்சி ஓசையை - இடையில் அணிந்த காஞ்சி யென்னும்
அணியின் ஒலியை, செவியில் உய்த்தும் - அவன் காதிற் புகச் செய்தும்,
கலவியின் உருவம் தீட்டும் தூசினை உடுத்தும் போர்த்தும் - கலவியின்
வடிவங்களை எழுதிய ஆடையை உடுத்தும் போர்த்தும், தூவிட்டவள்
போல் நின்றாள் - தூதனுப்பியவள்போல நின்றனள்.

     பசுமை என்பதன் ஈறுகெட்டு முதல் நீண்டது. ஆற்றாப்புலவியாள் -
தலைவனுடன் ஊடி நின்றவள் பின் அவ்வூடல் நீட்டிக்கப் பொறாதவளாய்.
காஞ்சி இடையிலணியும் அணிவிசேடம்; எண்கோவையுடையது.
கலவியினுருவம் - பற்குறி நகக்குறிகள் பாணிகொடு தட்டல், நற்கமிழ்து
துய்த்தவல் களி நன்கெழ அணைத்தல் முதலியன. இச்செய்யுள் உதாரம்
என்னும் குணவணி; தொழில் நுட்பமும் ஆம். (38)