(இ - ள்.) தணியல் உண்டு உள்ளம் சோரும் ஒருமகள் - கள்ளினை
நுகர்ந்து மதிமயங்கிய ஒரு மாது, தணியல் உண்பான் - கள்ளினைப் பருகுதற்
பொருட்டு, பிணி அவிழ் கோதையாள் ஓர் பெண்மகள் - முறுக்கவிழ்ந்த
மலர்மாலை யணிந்த ஒரு பெண், கலத்தில் வாக்கும் துணிமதுத் தாரை
தன்னை - வள்ளத்தில் வார்க்கின்ற தெளிந்த மது தாரையை, வாள் எனத்
துணிந்து - வாட்படை என்று துணிந்து, பேதாய் - அறிவில்லாதவளே, திணி
கதிர் வாளால் - செறிந்த ஒளியையுடைய வாட்படையினால், வள்ளம்
சிதைத்தியோ என்று நக்காள் - வள்ளத்தை அழிக்கின்றாயோ என்று கூறிச்
சிரித்தாள்.

     தணியல் - கள். உண்பான், வினையெச்சம். உண்பான் வாக்கும்
தாரையை என்க. துணி - தெளிவு. இது போல்வனவற்றை மயக்கவணியிற்
பாற் படுத்துக. (68)

     (இ - ள்.) மலர்தொறும் சிறு தேன் நக்கித் திரிவண்டு - பூக்கள்
தோறுஞ் சென்று சிறிய தேனை நக்கித் திரிகின்ற வண்டுகள், மடவார் -
மதுவுண்ணும் மகளிர், தம் கைத்தலன் எடுத்து ஓச்ச - தமது கையை
மேலெடுத்து ஓட்டவும், ஓடா - ஓடாமல், தடம் சாடி - பெரிய மதுச்
சாடியை, தழீஇமொய்ப்ப - தழுவி மொய்ப்பன வாயின; இலம் எனப்
பல்லோர் மாட்டும் இரந்து இரந்து - வறியம் என்று கூறிப் பலரிடத்தும்
பலகாலும் இரந்தும், இன்மை நீங்காது அலமரும் வறியோர் - இலம்பாடு
நீங்காமல் மனஞ் சுழன்று அலையும் வறுமையுடையோர், வைத்த நிதி
கண்டால் - சேமித்து வைத்த நிதியினைக்காணின், அகல்வரேயோ - (யாவர்
அகற்றினும் அதனைவிட்டு) நீங்குவரோ (நீங்கார் என்றபடி.)

     மலர்தொறுஞ் சிறுதேன் நக்கித் திரிதல் பல்லோர் மாட்டும் இரந்து
திரிதலை யொக்கும். ஓடா, ஈறுகெட்ட எதிர்மறை வினையெச்சம். தழீஇ,
சொல்லிசை யளபெடை. இது வேற்றுப்பொருள் வைப்பணி. (69)