(இ-ள்.) அம்பிகை ... கொடுக்க - உமையம்மையார் செம்பொற் கிண்ணத்தினில் அமுத ஞானத்தை ஊட்ட (அதனால்); அழுகை தீர்ந்த ... பிள்ளை - அழுகை தீர்ந்த செம்பவளம் போலும் திருவாயினையுடைய ஆளுடைய பிள்ளையாரும்; திருநாவுக்கரசர் - திருநாவுக்கரசு நாயனாரும்; எனச் சிறந்த ... கூட்டத்தில் - என்னும் பெருஞ் சிறப்புடைய எமது இரண்டு பெருமக்களும் இயைந்த இத்திருக்கூட்டத்தினைக் காணும் பேறு பெற்றதனால்; அரனடியார் இனபம் எய்தி - சிவனடியார்கள் இன்பம் பெற்று; உம்பர்களும் போற்றிசைப்ப உலகம் எல்லாம் சிவம் பெருகு ஒலி நிறைந்தார் - தேவர்களும் போற்றித் துதிக்கும்படி உலகமெல்லாம் சிவத்தைப் பெருகுவிக்கும் அரகர என்ற முழக்கத்தை நிறைத்தனர்.

(வி-ரை.) அம்பிகை ... வாய்ப்பிள்ளை - இக்கருத்துப் பற்றியே முன்னர் "வெற்பரையன் பாவைதிரு முலைப்பா லோடும். அடையநிறை சிவம்பெருக வளர்ஞானங் குழைத்தூட்ட அமுது செய்த" (1442) என்றும். "அம்மைதிருப் பாலமுதமுண்டபோதே" (1443), என்றும் குறித்தனர். நாயனார் பிள்ளையாரைத் தரிசித்த காலமாவது ஆளுடைய பிள்ளையார் திருத்தில்லையைத் தரிசித்துத், திரு எருக்கத்தம்புலியூர் திருமுதுகுன்றம் முதலிய தலங்களை வணங்கித், திருநெல்வாயிலரத்துறையில் முத்துச் சிவிகைபெற்றுச், சீகாழிக்குத் திரும்பி வந்து, முந்நூலணியப் பெற்றுத் தங்கியிருந்த காலம். அவரது சரிதத்தில் அப்போது முதன்மையாய் எங்கும் பரவித், தேற்றப்பட உலகம் கண்டு, போற்ற நின்ற செய்தி அவர் அம்மையார் அளித்த ஞானப்பாலை அமுது செய்து மூன்று வயதில் முழுஞானம் பெற்று விளங்கியமையேயாம். அவரது பெருஞ் சரிதத்தில் ஏனைய பெரும் பகுதிகள் பின்னிகழ உள்ளன. முத்துச் சிவிகை பெற்ற செய்தி அப்போது அணிமையில் நிகழ்ந்ததாதலின் உலகர் அறிந்து போற்றப் போதிய காலமின்றாம்; ஆதலின் இப்பெரும் குழ் ஒன்றுபற்றியே குறித்துப் போற்றினர்.¹