திரு ஆநிலை

     (க-ரை) பசுபதி ஈச்சுரரைப் பூசித்துக் கடல் சூழ்ந்த பூமியையும்
மற்றுமுள்ள அண்டங்களையும் பிரமனைப்போற் படைத்தற் றொழிலைப்
பூண்ட காமதேனு பிறந்தது வெண்ணெய் மலை சூழ்ந்த கருவூர் - அது
உள்ளது கொங்கு மண்டலம் என்பதாம்.

     வரலாறு:- ஒரு காலத்திற் காமதேனு கரூர்ச் சிவபெருமானைப்
பூசித்து வணங்கிற்று. பிரமதேவனைப் போல் உலகத்தைப் படைக்கும்
ஆற்றலைப் பெறுவாய் எனத் திருவாய் மலர்ந்தருள அவ்வாறே பெற்றுச்
சராசரங்களை முன்போலப் படைத்தது. அக்கரூருக்கு வடதிசையிலே
புசிப்பு நிமித்தம் வெண்ணெய் மலையென ஒன்று வகுத்துப்
பூசித்துக்கொண்டிருக்கிறது. இதனால் இத்தலத்துக்குத் திரு ஆநிலை
யெனப் பெயராயிற்று. (இது வெங்காலநாடு)

                      (மேற்)

              திருப்பாண்டிக் கொடுமுடி

     (க-ரை) பூச்சாத்த முடியாதவாறு உயர்ந்துள்ள சிவலிங்கப்
பெருமானது திருமுடியானது, குறுகிய வடிவுள்ள அகத்தியர் கைப்
பிடியிலடங்கப் பூமியுள் தாழ்ந்த மகுடேசுரர், எழுந்தருளியுள்ள கறையூர்
(திருப்பாண்டிக் கொடுமுடி) இருப்பது கொங்கு மண்டலம் என்பதாம்.