முல்லை நிலம்
 

    பழங்காலத்தில் தமிழ் நாட்டில் மரஞ் செறிந்த காடுகள் மலிந்திருந்தன.
பண்டைத் தமிழரசர்களாகிய கரிகால் வளவன் முதலியோர் காடு கொன்று
நாடாக்கினர் என்று கூறப்படுகின்றது.¹⁹ ஆயினும், அந் நாளில் இருந்து
அழிபட்ட காடுகளின் தன்மையைச் சில ஊர்ப்பெயர்களால் உணரலாம்.
இக்காலத்தில் பாடல் பெற்ற தலங்கள் என்று போற்றப்படுகின்ற ஊர்கள்
முற்காலத்தில் பெரும்பாலும் வனங்களாகவே இருந்தன என்பது சமய
வரலாற்றால் அறியப்படும். சிதம்பரம் ஆதியில் தில்லைவனம்; மதுரை
கடம்பவனம்; திருநெல்வேலி வேணுவனம். இவ்வாறே இன்னும் பல
வனங்கள் புராணங்களிற் கூறப்படும்.²⁰

காடு

    தமிழ் நாட்டில் ஆர்க்காடும், ஆலங்காடும், வேற்காடும், களக்காடும் பிற

காடுகளும் இருந்தன என்பது ஊர்ப் பெயர்களால் விளங்கும். ஆர் என்பது

ஆத்தி மரத்தைக் குறிக்கும்.²¹ ஆத்தி மாலை அணிந்த சோழ மன்னனை

‘ஆரங்கண்ணிச் சோழன்’ என்று சிலப்பதிகாரப் பதிகம் குறிக்கின்றது.
அந்நாளில் ஆத்தி மரம் நிறைந்திருந்த நிலப்பகுதி ஆர்க்காடு என்று பெயர்
பெற்றது.²² இக் காலத்தில் ஆர்க்காடு என்பது ஒரு நாட்டுக்கும் நகருக்கும்

பெயராக வழங்குகின்றது. ஆர்க்காட்டுக்கு அணித்தாக ஆர்ப்பாக்கம் என்ற
ஊர் உள்ளது. அன்றியும் சோழ நாட்டின் பழைய தலைநகரம் ஆரூர்

ஆகும். அது பாடல் பெற்ற பின்பு திருவாரூர் ஆயிற்று.