61

	கொண்டைக் கூழைத் தண் தழைக் கடைசியர்
	சிறு மாண் நெய்தல் ஆம்பலொடு கட்கும்,
	மலங்கு மிளிர், செறுவின் தளம்பு தடிந்து இட்ட
	பழன வாளைப் பரூஉக் கண் துணியல்
5	புது நெல் வெண் சோற்றுக் கண்ணுறை ஆக,
	விலாப் புடை மருங்கு விசிப்ப மாந்தி,
	நீடு கதிர்க் கழனிச் சூடு தடுமாறும்
	வன் கை வினைஞர் புன் தலைச் சிறாஅர்
	தெங்கு படு வியன் பழம் முனையின், தந்தையர்
10	குறைக்கண் நெடும் போர் ஏறி, விசைத்து எழுந்து
	செழுங் கோள் பெண்ணைப் பழம் தொட முயலும்,
	வைகல் யாணர், நல் நாட்டுப் பொருநன்,
	எஃகு விளங்கு தடக் கை இயல் தேர்ச் சென்னி,
	சிலைத் தார் அகலம் மலைக்குநர் உளர்எனின்,
15	தாம் அறிகுவர் தமக்கு உறுதி; யாம் அவன்
	எழு உறழ் திணி தோள் வழு இன்று மலைந்தோர்
	வாழக் கண்டன்றும் இலமே; தாழாது,
	திருந்து அடி பொருந்த வல்லோர்
	வருந்தக் காண்டல், அதனினும் இலமே.