என்-னின், இதுவும் பெருந்திணைப்பாலவாமாறு உணர்த்துதல் நுதலிற்று.

(இ - ள்.) செலவழுங்கல் முதலாகக் குறுங்கலியீறாகச்சொல்லப்பட்ட பதினேழும் பெருந்திணைப்பாலவாம் எ-று.

அவற்றுள்:-

325. செலவழுங்கல்

நிலவுவே னெடுந்தகை நீள்கழையாற்றிடைச்
செலவுமுன் வலித்துச் செலவழுங் கின்று.

(இ - ள்.) நிலவுபோல ஒளிவிடும் வேலினையும்பெரிய மேம்பாட்டினையுமுடையவன் உயர்ந்த மூங்கில் இயைந்த வழியிடைப் போவானாக முன்னே நிச்சயித்துப் போக்கு ஒழிந்தது எ-று.

வ - று.¹நடுங்கி நறுநுதலா ணன்னலம்பீர்பூப்ப
ஒடுங்கி யுயங்க லொழியக் - கடுங்கணை
²வில்லே ருழவர் விடரோங்கு மாமலைச்
செல்லே மொழிக செலவு.

(இ - ள்.) நடுக்கமுற்று, மணங்கமழும் நுதலினையுடையாள் மிக்க அழகு பீர்க்கம்பூப்போலப் பசப்ப மெலிந்து வருந்துதல் தவிரக் கொடிய அம்பினையுடைய வில்லை ஏருழவாகவுடைய வேடர்தம் முழையையுடைய உயர்ந்த பெரிய மலையிடத்துப்போகாம்; நெஞ்சே, தவிர்வாயாக போக்கை எ-று.

(1)

326. மடலூர்தல்

ஒன்றல்ல பலபாடி
மன்றிடை மடலூர்ந்தன்று.

(இ - ள்.) ஒன்றன்றியே பலவற்றையும் சொல்லி மன்றின்நடுவே மடன்மாவைச் செலுத்தியது எ-று.

வ - று. இன்றிப் படரோ டியானுழப்பவைங்கணையான்
வென்றிப் பதாகை யெடுத்தானாம் - மன்றில்
தனிமடமா னோக்கி தகைநலம்பா ராட்டிக்
குனிமடன்மாப் பண்ணிமேல் கொண்டு.

1. தொல். அகத். சூ. 54, இளம். மேற்.; 2. பு. வெ. 5, கொளு, குறள், 872.