இது இலக்கண விளக்கம் 333, 334, 335, என்ற சூத்திரங்களையும்
இறுதிப்பகுதி இலக்கணக்கொத்து 79ஆம் சூத்திரத்தையும் தழுவியது.

      ‘‘அறுதொகை அறைகுவர் அறிவுடையார் பலர்;
       படுதொகையொடு தொகை ஏழென்பார் சிலர்’’

என்பது இலக்கணக்கொத்துச் சூத்திரம்.

இது அறுவகைத் தொகையின் இலக்கணம் கூறுகின்றது.

     உரை : வேற்றுமைத்தொகை அதற்குரிய வேற்றுமை உருபின்
பொருளில் வரும். உவமைத் தொகையில் உருவம், பண்பு முதலிய
விளக்கும்சொல் மறைந்து நின்று அப்பொருளை விளக்கும். உம்மைத்
தொகையாவது இரண்டுக்கு மேற்பட்ட பல பெயர்ச் சொற்களிடத்து உம்மை
மறைந்து எண்ணல், எடுத்தல், முகத்தல், நீட்டல் என்னும் நான்கு அளவைப்
பொருளை விரித்துக்காட்டும். வினைத்தொகை மூன்று காலத்தின் கண்
நிகழும். பண்புத்தொகை இன்னது இது என ஒன்றனை ஒன்று விசேடித்து
இரண்டு சொல்லும் ஒரு பொருள்மேல் வரும் இயல்பினை உடையது.
வேற்றுமைத்தொகை, உம்மைத் தொகை, வினைத்தொகை, பண்புத்தொகை,
உவமைத்தொகை ஆகியவற்றின் இறுதியில் வேறொரு பெயர் தோன்ற
வருமாயின் அன்மொழித்தொகை எனப்படும்.