விளக்கம் :

     இது நம்பியகப்பொருள் 25, 26, 27, 28 ஆகிய சூத்திரங்களைத்
தழுவியது. ஆயினும் ஐந்திணையிலும் கைக்கிளையும் பெருந்திணையும்
மயங்கும் என்பது நம்பியகப் பொருளில் காணப்படவில்லை. இகுளை என்பது
இகுழை என்று இங்கு வந்துள்ளது.

இது கைக்கிளை, இயற்கைப்புணர்ச்சி ஆகிய இரண்டையும்
விளக்குகின்றது.

     உரை : தலைவியிடத்து உண்டாகும் குறிப்பினைத்தான் அறியும் வரை
தலைவன் அவளைச் சாராது நின்று நெஞ்சோடு சொல்லுதல் கைக்கிளையாம்.
தெய்வத்தாலும் தலைவியாலும் பெறப்படுவது இயற்கைப் புணர்ச்சி உள்ளத்தாற்
புணரும் புணர்ச்சி மெய்யுற்றுப் புணரும் புணர்ச்சி என இரண்டும் களவுப்
புணர்ச்சிக்கண் உரிய. தலைமகளுக்கு நாணும், மடமும், ஆகிய இரண்டும்
பெருமையும், உரனும் நிறைந்த தலைவனைப் பொருந்தும் குணமாதலின்,
உள்ளப்புணர்ச்சி முன் நிகழ்தற்கு உரியது. காட்சி முதலாகச் சாக்காடு ஈறாக
உள்ள பத்தும் நிகழுமாயின் மெய்யுறு புணர்ச்சி கூடுதற்கு உரித்தாம்.