அந்தாதி கலம்பகம், கன்மணிமாலை முதலியவற்றின் இலக்கணமும்
வகுப்பு அடிப்படையில் பாட்டின் தொகையும் கூறுகின்றது.

     உரை : வெண்பாவால் அந்தாதித் தொடை வரப்பாடுவது வெண்பா
அந்தாதி. கலித்துறையால் அந்தாதித் தொடை வரப்பாடுவது கலித்துறை
அந்தாதி. விருத்தப்பாக்களால் அந்தாதித் தொடையில் பாடுவது
விருத்தத்தந்தாதி. பத்துப்பத்துப் பாடல்களாக அந்தாதித் தொடையில்
பாடுவது பதிற்றுப்பத்து அந்தாதி.

     கலிப்பாவும், வெண்கலித்துறையும் முதலிலும் பின்னர் பாவினங்கள்
முழுமையும் பல துறையும் வகுப்பும் தொடரப் பாடுவது கலம்பகம். இவற்றில்
சில குறைந்தால் அது பன்மணி மாலை எனப்படும்.

     நூறு பாடல் தேவர்களுக்கும், தொண்ணூறு ஐயர்க்கும் எண்பது
அரசர்க்கும் எழுபது அமைச்சர்க்கும் அறுபது வணிகர்க்கும் ஐம்பது
சூத்திரர்க்கும் பாடுவர்.

     விளக்கம் : வெண்பாப்பாட்டியல் செய்யுளியல் 10, 12 சூத்திரங்களில்
கூறியதைத் தழுவியது.

பரணி, திக்குவிசையும், காதல் ஆகியவற்றின் இலக்கணம் கூறுகின்றது.