உயர்திணைப் பெண்பாற் பெயர்கள்

479. உரைத்த குடிமுத லுற்ற ளகார
     ஈற்றவு மிகர விறுதிக் கிளவியும்
     அத்திணைப் பெண்பாற் படர்க்கை யாகும்.

(இ-ள்.) மேற்கூறிப்போந்த குடிப்பெயர் முதலிய பத்துப் பெயர்களினிறுதி,
ளகரவொற்றுப் பெயரும், இகரவிறுதிப் பெயரும் உயர்திணைப் பெண்பாற் படர்க்கைப்
பெயராம்.

(வ-று.) சோழியள், சேரமாள், அவையத்தாள், வருவாள், வெற்பள், திணிதோளாள்,
கறுப்பி, ஒருத்தி, அவள், இவள், உவள், எவள், யாவள் எனவரும். (22)

இதுவுமது

480. தையன் மகடூஉ நங்கை செவிலி
      தோழியு மதன்பால வென்மனார் புலவர்.

(இ-ள்.) தையல், மகடூஉ, நங்கை, செவிலி, தோழி உயர் திணைப் பெண்பாற்
படர்க்கைப் பெயராம்.

(வி-ரை.)

‘கிளைமுத லாகக் கிளந்த பொருள்களுள்
ளவ்வொற் றிகரக் கேற்ற வீற்றவும்
தோழி செவிலி மகடூஉ நங்கை
தையலோ டின்னன பெண்பாற் பெயரே’ (நன்-பெயரியல்-20)

என்று நன்னூற் கருத்துக்கள் மேலைய நூற்பாவிலும் இந்நூற்பாவிலும் இடம் பெற்றுள்ளன.
(23)

உயர்திணைப் பலர்பாற் பெயர்கள்

481. குடிமுத லாகக் குறித்தவற் றிறுதி
     ரகாரைப் பெயரு மாரைக் கிளவியும்
     உயர்திணைப் பலர்பாற் படர்க்கைப் பெயரே.

(இ-ள்.) குடிமுதலாகக் கருதிய பெயர்களினிறுதி ரகர வொற்றுப் பெயரும் மார்விகுதிப்
பெயரும் உயர்திணைப் பலர்பாற் படர்க்கைப் பெயராம்.