(இ-ள்.) பல்ல - சில்ல, பல - சில, உள்ள - இல்ல, உள - இல அஃறிணைப்
பலவின்பாற் படர்க்கைப் பெயராம்.

(வி-ரை.)

‘முன்ன ரவ்வொடு வருவை அவ்வும்
சுட்டிறு வவ்வுங் கள்ளிறு மொழியும்
ஒன்ற லெண்ணு முள்ள வில்ல
பல்ல சில்ல வுளவில பலசில
இன்னவும் பலவின் பெயரா கும்மே’ (பெயரி - 23)

என்ற நன்னூற் கருத்துக்கள் மேலைய நூற்பாவிலும் இந்நூற்பாவிலும் இடம் பெற்றுள்ளன.
(27)

இருதிணைப் பொதுப்பெயர்

485. சினைப்பெயர் முதற்பெயர் சினைமுதற் பெயரே
     முறைப்பெயர் தன்மை முன்னிலைப் பெயரே
     எல்லாம் பொதுப்பெய ரென்மனார் புலவர்.

(இ-ள்.) சினைப்பெயரும், முதற்பெயரும், சினைமுதற்பெயரும், முறைப்பெயரும்,
தன்மைப் பெயரும், முன்னிலைப் பெயரும், எல்லாமென்னும் பெயரும் இருதிணைக்கும்
பொதுவாகிய பெயராம். (28)

அதன் வகை

486. அவற்றுள்,
     சினைப்பெயர் நான்கே சினைமுதற் பெயரொரு
     நான்கே யியற்பெயர் நான்கே முறைப்பெயர்
     ஓரிரண் டென்மனா ருணர்ந்திசி னோரே.

(இ-ள்.) சினைப்பெயர் நான்கு, சினைமுதற்பெயர் நான்கு, இயற்பெயர் நான்கு,
முறைப்பெய ரிரண்டாகும். (29)

சினைப்பெயர்

487. ஆண்மைச் சினைப்பெயர் பெண்மைச் சினைப்பெயர்
     ஒருமைச் சினைப்பெயர் பன்மைச் சினைப்பெயர்
     அந்நான் கென்ப சினைப்பெயர்க் கிளவி.