என்பது, பொருந்தாதபொருளைச் சேர்த்துமுடிப்பது பிறபொருள் வைப்பு.

(வ-று.)

ஆர வடமு மதிசீத சந்தனமும்
ஈர நிலவு மெரிவிரியும்-பாரிற்
றுதிவகையான் மேம்பட்ட துப்புரவுந் தத்தம்
விதிவகையான் வேறு படும். (தண்டி-மேற்) (66)

கூடாவியற்கை யெனினுமமையும்.

கூடும் இயற்கை

1220. கூடும் பொருளைக் கூட்டி யுரைப்பது
      கூடுமி யற்கையாங் குறிக்குங் காலே

என்பது, கூடும்பொருளைச் சேர்த்துக்கூறல் கூடுமியற்கை
வேற்றுப்பொருள்வைப்பணி.

(வ-று.)

பொய்யுரையா நண்பர் புனைதேர் நெறிநோக்கிக்
கைவளைசோர்ந் தாவி கரைகுவரான்-மெய்வெதும்பப்
பூத்தகையுஞ் செங்காந்தட் பொங்கொலிநீர் ஞாலத்துத்
தீத்தகையார்க் கீதோ செயல். (தண்டி-மேற்) (67)

இருமை இயற்கை

1221. இருமையு மியைவன விருமை யியற்கை.

என்பது, கூடாவியற்கையும் கூடுமியற்கையும் பொருந்துவன இருமை யியற்கை
வேற்றுப்பொருள் வைப்பணி.

(வ-று.)

கோவலர்வாய் வேய்ங்குழலே யன்றிக் குரைகடலுங்
கூவித் தமியோரைக் கொல்லுமால்-பாவாய்
பெரியோரும் பேணாது செய்வரே போலுஞ்
சிறியோர் பிறர்க்கியற்றுந் தீங்கு. (தண்டி-மேற்) (68)

வேற்றுமையணி

1222. உரைப்பினுங் குறிப்பினு மொப்புடை யிருபொருள்
      வேற்றுமைப் படவரின் வேற்றுமை யாகும்.