(வி-ரை.) ஆன்-அவ்விடம். ஈன்-இவ்விடம். ஊன்-உவ்விடம். (165)

அவ்வயின் முதலியன

325. சுட்டுமுதல் வயினும் வினாமுதல் வயினும்
     அப்பண் பினவா மாயுங் காலே.

(இ-ள்.) சுட்டெழுத்தை முதலாகவுடைய வயினென்னு மொழியும், வினாவெழுத்தை
முதலாகவுடைய வயினென்னு மொழியும் றகரமாகத் திரியும்.

(வ-று.) அவ்வயிற்கொண்டான். இவ்வயிற்கொண்டான், உவ்வயிற் கொண்டான்,
எவ்வயிற்கொண்டான், யாவயிற்கொண்டான். (166)

எகின் மரம்

326. எகின்மர மாயின் அம்மொடு சிவணும்.

(இ-ள்.) எகினென்னுஞ் சொல் மரப்பெயராயின் அம்முச்சாரியை பெறும்.

(வ-று.) எகினங்கோடு. (167)

குயின்

327. இருவழி யினுங்குயி னியல்பா கும்மே.

(இ-ள்.) அல்வழிவேற்றுமை இரண்டிடத்துங் குயினென்னுஞ் சொல் மிகாதியல்பாகும்.

(வ-று.) குயின்கால்.

(வி-ரை.) குயின் - மேகம். குயினுதல்-துளைத்தல். குயின் என்பது பெயராகவும்
வரும்; வினையாகவும் வரும். (168)

மரம் அல் எகின்

328. மரமல் லெகின்மொழி வலிமெலி மிகுதலும்
     அகரச் சாரியை யடையவும் பெறுமே.

(இ-ள்.) மரப்பெயரல்லாத எகினென்னுஞ் சொல் ஒருகால் வல்லினமும் ஒருகால்
மெல்லினமும் மிகுதலும் அதனோ டகரச்சாரியை பெறுதலுமாம்.