கருத்து : இது, முன் “பாடாண் பகுதி நாடுங்காலை நாலிரண்டுடைத்து” எனச் சுட்டிய பாடாண் வகைப் பொருள் எட்டினியலும் பெயரும் கூறுகிறது.

பொருள் : (1) கொடுப்போரேத்தி = கொடுக்கும் வள்ளல்களைப் புகழ்தலும்;

குறிப்பு : இதில் “ஏத்தி” எனுமெச்சத்தை ஏத்தல் வினை எனப் பெயராக்கி வேறு பிரித்தெண்ணல் வேண்டும்; “வன்கண் குடிகாத்தல் கற்றறிதல் ஆள்வினையோ டைந்துடன் மாண்டதரசு” எனுங் குறளில், ஐந்தெனும் எண் கருதிக் “கற்றறிதலை”க் கற்றலும் அறிதலுமாகப் பிரித்தெண்ணியதுபோல. இதற்குச் செய்யுள்:

“பாரி பாரி யென்றுபல வேத்தி
 ஒருவற் புகழ்வர் செந்நாப் புலவர்.
 பாரி ஒருவனு மல்லன்;
 மாரியு முண்டீண் டுலகுபுரப் பதுவே”

- புறம். 107

பொருள் : (2) கொடாஅர்ப் பழித்தலும் = பற்றுள்ளத்தால் ஈயாதிவறியாரை இகழ்தலும்;

  குறிப்பு : ஈயார் பழியும் ஈவோர் புகழாமாதலின், அதுவும் பாடாணாயிற்று. அதற்குச் செய்யுள்:

“பண்டும் பண்டும் பாடுந ருவப்ப
 விண்டோய் சிமைய விறல்வரைக் கவஅற்
 கிழவன் சேட்புலம் படரினிழையணிந்து
 புன்றலை மடப்பிடி பரிசி லாகப்
 பெண்டிரும் தம்பதங் கொடுக்கும் வண்புகழ்க்
 கண்டீ ரக்கோ னாகலி னன்று
 முயங்க லான்றிசின் யானே; பொலந்தேர்
 நன்னன் மருக னன்றியும் நீயே
 முயங்கற் கொத்தனை மன்னே; வயங்குமொழிப்
 பாடுநற் கடைத்த கதவின் ஆடுமழை