துவளுகின்ற நுண்ணிய இடையினையுடைய பெருமாட்டியைப் பாகம்
கொண்டவரது திருமாளிகைப் பத்தியைச் சூழ்கின்ற திருமுன்பு பக்கங்களில்
வலங்கொண்டு உள்புக்குத் தழைக்கின்ற ஒளியுடைய பேரின்ப வெள்ளம்
தேங்கி நிற்கும் ஒப்பற்ற வேத மாமர மாகிய தெய்வத் தருவினது அருள்
வடிவாகிய நிழலிலே வீற்றிருக்கின்ற தழைக்கும் கருணை வடிவைக்
கண்களாரக் கண்டனர்.

     பொருந்தும் முறைமையினால் எட்டுறுப்பும், ஐந்துறுப்பும் மண்ணில்
தோயுமாறு பன்முறை வணங்கி மகிழ்ச்சியில் மூழ்கிக் கண்கள் நீர்வார
நிர்க்குணனாய் வடிவின்றி எழுந்த அழகிய அருவுருவாகிய சிவலிங்கத்தினைக்
கண்டு போற்றித் துன்பில்லாத மெய்யருளைப்பெற்றுக் கடல் நீரைப்
பருகியவர் மீண்டனர்.

     பிரவாக அநாதியாய் வரும் கொடிய வினையைக் கெடுக்கும்
திருவேகம்பத்தை விரும்பி இடமாகக் கொண்டவர்க்குத் தென்திசையில்
அகத்தியேசர் எனப் பெயரிய சிவலிங்கம் நிறுவி வழிபாடு செய்து முதலில்
வரங்கள் பலவும் பெற்று மேன்மே லுந்தி எழும் பேரன்பினால் மின்னிடும்
சிவந்த சடைப் பெருமானாரை மீளவும் போற்ற லுற்றனர்.

அகத்தியர் துதித்தல்

கொச்சகக் கலிப்பா

     ஏனைய பிறவி யெல்லாம் துணையாக இப்பிறவியே இந்நாளே
எனக்குப் பயன் பட்டது. இந்நாளே எனக்குப் பயன் பட்டது என் அறிவும்.
எங்ஙனமெனின், இந்நாள் உனைக் காணப் பெற்றமையால் எம்மரசே!