இது கடலை நோக்கிக் கூறியது. சமுத்திரோபாலம்பனம் என்பர்.

     (இ-ள்.) அடுத்து.......ஆழியே - மேலும் மேலும் அடுத்து அலைகளை வீசி எழுகின்ற கடலே; தடுத்து.......நீட்டுநீ - பிறதேவர்களை எல்லாம் துன்புறுத்திய நஞ்சை, என்னை முன்னே தடுத்து ஆட்கொண்ட இறைவனே உண்ணும்படி உன் அலைகளாகிய கைகளினாலே எடுத்து நீட்டிக் கொடுத்த
நீ; என்ன இன்று என்செயாய்? - என்னை இன்றைக்கு என்ன
செய்யமாட்டாய்?

     (வி-ரை.) அடுத்து மேல்மேல் அலைத்து எழும் - கடலினது ஆரவார மிகுதி கூறியவாறு. பிரிந்தார்க்கு வருத்தம் மிகச் செய்வது கடலின் ஆரவாரமென்பது அகப்பொருளிற் காணும் உண்மைக் குறிப்பாம்.

     அலைத்து எழும் - ஆழியே! அலைத் தெழுதலே உனது
இயல்பாயிற்று. ஆதலின் பிறரையும் அலைத்தல் உனது தொழிலுமாயிற்று. உன்னையே அலைத்து எழுவதன்றிப் பிறரையும் அடுத்தடுத்து மேன்மேலும் அலைப்பாயாயினாய் என்றபடி. அலைத்து - வருத்தி.

     எனையாண்டவர் தாம் உண - எனையாண்டவர்க்கும், அவர் தாமே உண்ணும்படி. உயர்வு சிறப்பு உம்மை தொக்கது. தாம் - அவர் தாமே.
எவரும் தாங்கலாகாமையில் அவர் தாமே உண்ண.

     எடுத்து நீட்டு நீ - உண்பதற்கு நஞ்சு கொடுக்கின்றோமே என்று சிறிதும் மறைவும், நாணமும், அச்சமுமின்றி வெளிப்படையாய் எடுத்து
நீட்டிய நீ.

     என்னை - நானே நேரிற் பெற்றுக்கொண்டு போயினேன். (ஆலாலசுந்தரன் என்ற பெயர்க்காரணம் காண்க.) ஆதலின் உன் தன்மை நேரில் அறிந்துள்ளேனாகிய என்னை என்க. என் தலைவனுக்கே வெளிப்பட நஞ்சு கொடுத்த நீ என்னை என்னதான் செய்யமாட்டாய் என்ற குறிப்பு.

     இன்று - இன்றைக்கு. நாளை மணம் நிகழ்ந்த பின் ஒன்றும் செய்ய இயலாது என்க.

     இது தென்றலை நோக்கிக் கூறிய கூற்று.

     (இ-ள்.) தமிழ் மருதம்! - இனிய தென்றலே!; பிறந்தது ........ மலயத்திடை - நீ பிறந்தது எங்கள் பெருமானாகிய இறைவனுடைய பொதிய மலையிலேயாம்; சிறந்து ........ புறம்பணைத் தடம் - (அவ்வாறு பிறந்த இடத்தினின்று இங்குச் சிறப்புப்பெற்று வந்து) சேர்ந்த வழியாவது தெய்வத் தன்மை பொருந்திய சோழநாட்டுத் தடாகங்களின் வழியாம்; பொங்கு ..... எங்கோ? - (இவ்வாறாகவும்) தீக் காற்று வீசும்படியாக நீ வன்மை பழகியது எங்கேயோ? (மாருதம் - அண்மைவிளி).

     (வி-ரை.) தமிழ் - இனிமை. இனிய மொழியாதலின் தமிழ் மொழிக்குக் காரணப் பெயராய் வந்ததென்பர். “தமிழ் தழீஇய சாயல்“ என்றதும் காண்க. மலயத்திலே தமிழ் முனியிருத்தலின் அங்கே பிறந்த மாருதம் தமிழ் மாருதமாயிற்று என்று கொண்டு தமிழுடன் பயின்ற மாருதம் என்றுரைத்தலுமொன்று.