நிகழும் இந்நாளில், உலகம் செழித்து உய்வதெங்ஙனமோ? என்பது
அறிஞர்களின் வினா. ஆனிரைகள் செழிக்காது நடையுடற் கூடுகளாய்த்
திரியக்காணும் இந்நாளில் மக்களின் சுகமும் அதற்குத்தக
மெலிந்துகாண்பதாம் என்பது அறிஞர் கண்ட உண்மை. இவற்றையெல்லாம்
சிந்தித்து உலகம் திருந்த ஒழுகி உய்வதாக.

     (இ-ள்.) வெளிப்படை. ஆனிரையின் தொகுதிகள் அவ்வாறு
பெருகும்படி காப்பாற்றிக், கோபாலர்களாகிய இடையர்கள் என்றும் தமது
சொல்வழியே ஒழுகித் தமது ஏவல்களைச் செய்து நிற்க, ஆயர்குலத்தைக்
காப்பாற்றும் பெரியாராகிய ஆனாயர், சிவபெருமானது திருவடிகளில் அன்பு
பொருந்திய இசையுடனே துளைக்கருவிக் குழல் வாசித்தலை மேற்கொண்டார்.

     (வி-ரை.) அப்படி அளித்தலாவது மேலிரண்டு பாட்டுக்களினும்
சொல்லியபடி பாதுகாத்தல். பல்குதல் - பெருகுதல். என்றும் என்றதனை
அளித்து என்றதனோடும், புரிந்திட என்றதனோடும் தனித்தனி கூட்டிப்
பொருள் கொள்ளுமாறு இடையில் வைத்த அமைதி காண்க.

     கோவலர் - கோபாலர் - இடையர். "இடைமகன்" (சண்டீசர் புரா -
24). ஏவல் புரிந்திட - ஏனையிடையர் தமது ஏவல் கேட்டு ஆனிரைக்
குலங்களைக் காத்து வந்தார்களாக, இவர், அவர்களைத் தம் ஏவல்வழி
நிறுத்தித் தலைவராய் விளங்கினார் என்க. இதனை 943 - 945ல்
விரித்திருத்தலும் காண்க.

     அடி அன்புறு........வாசனை - கானம் திருவடி யன்புடன் கூடாத
போது பெறும் புலனின்பமா யொழியும். ஆதலின் அடியன்புறு கானத்தின்
மேவும் என்று விசேடித்தார். இந்தக் கானமே இறைவன்றன் றிருச்செவியி
னருகணையப் பெருகும் தன்மையுடையதென்பது 962ல் அறியப்படும். அது
குறிக்க இங்கு இவ்வாறு தொடங்கிக்கொண்டார். கானம் - இசைக்கலை.
துளைக்கருவி - துளைகளின் வழியே இசை ஓசையினை வெளிப்படுக்கும்
ஊது கருவி.

     துளைக்கருவிக் குழல் - துளைக் கருவியாகிய குழல். துளைகளின்
எண் - வரிசை - தொழில் செய்யும்முறை முதலியவற்றை 938, 948, 949, 951,
954 என்ற திருப்பாட்டுக்களில் விரிக்கப்பட்டமை காண்க. இசையினையுடைய
துளைமேவிய கருவிக்குழல் என்றலுமாம்.

     குழல் வாசனை - குழல் வாசித்தலினை. மேற்கொள்ளுதல் -
மேற்கொண்டு பல நாளும் பயிலுதல். வாசனை - வாசித்தல் என்ற
பொருளில் வழங்கும் இசைக்கலை மரபு வழக்கு. 961, 965 பார்க்க. குழல் -
குழல் வாசித்தலை, வாசனை - பூர்வவாசனையினால் என்றுரைத்தலுமாம். 12

                        வேறு