(இ-ள்.) வெளிப்படை. நல்லனவாகிய நவகும்பங்கள் பெறுதற்கு நாடி
எடுத்துக்கொண்டு நாணல்கள் நெருங்கிய அழகிய கொல்லை யிடத்தும்,
ஆற்றிடைக் குறை மறைவிலும் மேய்கின்ற பசுக்களுடன்கூட விரைவில்
அணைந்து பாற்பசு ஒன்றுக்கு ஒருகாலாக எதிரே போக, அவையும்
முலைதீண்டியவுடன் கனைத்துச் செழும்பால் பொழிந்தன.

     (வி-ரை.) நல்ல நவகும்பங்கள் - நல்லனவாகிய ஒன்பது கும்பங்கள்.
"ஆன்மார்த்த பூசைக்கும் நவகும்பங்கள் தாபித்து அபிடேகம்
செய்யலாமென்று காமிகாகமங் கூறுகின்றமையால் அது வருமாறு....." என்பது
சைவ பூக்ஷணம்; 71-ம் பக்கம் (104) காண்க. ஒன்பது கும்பங்கள் தாபித்துத்
திருமஞ்சன மாட்டுதல் ஆகமவிதிகளுள் ஒன்று. நவகும்பம் -
(பூசைக்காதலின்) புதிய குடங்கள் என்பாருமுண்டு.

     பெற நாடி கொண்டு - பெற - எண்ணி; நாடி - அதற்காக முயன்று;
கொண்டு - வந்ததைப் பெற்றுக்கொண்டு. நாணற்கொல்லை - குறைமறைவு
- இவை பசுக்கள் மேயும் இடங்கள்.

     ஒன்றுக் கொருகாலாக எதிர் செல்ல - முலைதீண்ட என்க. ஒரு
பசுவினது மடியில் ஒரு முலைக்காம்பில் பால்பெறும்படி முலையைத் தீண்ட.
ஒருகாலாக - என்றது முலைக்காம்பாக என்ற பொருளிலும், எதிர் செல்ல
என்றது முறையாகப் போக - நிகழ - என்ற பொருளிலும் வந்தன.

     ஒருகாலாக - பால் கறத்தலில் வழங்கும் மரபு வழக்கு. இவ்வாறன்றி
ஒருதரம் என்று கூறுவாருமுண்டு. முலைதீண்டச் செழும்பால் பொழிந்தன
- விசாரசருமனாரைக் கண்ட மாத்திரத்தில் அருகுசார்ந்து உருகி முலைசுரந்து
கறவாமே பால் சொரிந்த பசுக்கள், அவர், தம்மை யணைந்து முலைதீண்டப்
பால் பொழிதல் ஒரு வியப்பாமோ?

     பொழிந்தனவால் - விசாரசருமனாரைத் தம் கன்றாகப் பசுக்கள்
நினைந்த நிலையை முன்னரும் "பொழிந்தனவால்" (1235) என்ற இதே
சொல்லினாற் கூறினார். முன்னர்க் கூறியது பசுக்கள் விசாரசருமனாரை
அருகுசார்ந்து பால் பொழிந்தநிலை; இங்குக் கூறியது பசுக்களை அவை
மேயுமிடத்து விசாரசருமனார் அணைந்து முலைதீண்டியபோது பால் சுரந்து
பொழிந்த நிலை.

     முலைதீண்ட என்றது அன்பு பெருகப் பால் சுரக்கச்செய்யும் செயல்
அளவில் நின்றது. இங்கும் கறவாமே தீண்டிய அளவில் பால் பொழிந்தன
என்க.

     கனைத்தல் - அன்பின் பெருக்கால் நிகழும் மெய்ப்பாடு. முன்னரும் "கனைத்துச் சுரந்து" (1235) என்றது காண்க. 34