| 3962. | மலையொடு மலைகள் மலைந்தென, வலைமத வருவி கொழிப்பொடு
சிலையினர் விசையின் மிசைத்தெறுங், கொலைமத கரிகொலை யுற்றவே.
|
(இ-ள்) மலையொடு....மலைந்தென - மலையோடு மலைகள் பொருதனபோல;
அலைமத...கொழிப்பொடு - அலைபோலப் பாயும் மதமாகிய அருவியின் ஆர்ப்புடனே;
சிலையினர்.....தெறும் - மேலேறிய வில்வீரர்களின் செலுத்துகின்ற வேகத்தினும் அழிவு
செய்யும் தன்மையுடைய; கொலை.....கொலையுற்றவே - கொலை செய்கின்ற யானைகள்
தாமும் கொலையுண்டன.
|
(வி-ரை) மலையொடு....மலைந்தென - யானைகள் ஒன்றோடொன்று
முட்டிப்பொருதல் மலைகள் பொருவன போன்றன என்பதாம்; மெய்யும் வினையும்பற்றி
வந்த உவமம். இவ்வடி முற்றுமோனை. “மலைகளுடன் போதுவ போன்ற” (3795).
|
அருவி கொழிப்பொடு....தெறும் - என்று கூட்டுக. மலைகளை உவமை
கூறியதனால் அருவியும் ஈரிடத்தும் ஒக்குமென்றவாறு.
|
சிலையினர் - மேலேறிக் கடவும் வில்வீரர்கள்; விசையின் - இன் - ஒப்புப்
பொருளில் வந்த ஐந்தனுருபு.
|
விசையின் - கடவி ஏவும் விசையினாலே என ஏதுப் பொருள் கொள்ளலுமாம்.
|
கொலை மதகரி கொலையுற்ற - ஒரு யானையைக் கொலைசெய்த யானை
தானும் பிறிதொன்றதனாற் கொலையுண்டது; இவ்வாறு பல - என்பார் உற்ற என -
அகரவீற்றுப் பலவறி சொல்லாற் கூறினார். கொன்றான் கொல்லப்படுவான் என்று
வினைப்பயன் பற்றிய ஞானநூற் கருத்துப்பட நின்ற குறிப்பும் காண்க.
இப்பாட்டால் யானைப் போரின் மூண்டநிலை கூறப்பட்டது. 21
|
| வேறு
|
| 3963. | சூறை மாருத மொத்தெதிர், ஏறு பாய்பரி வித்தகர்,
வேறு வேறு தலைப்பெய்து, சீறி யாவி செகுத்தனர். 22
|
(இ-ள்) சூறை மாருதம் ஒத்து - சூறாவளியைப் போன்று; எதிர்....வித்தகர் -
எதிரெதிராக ஏறுதலைக்கொண்டு பாய்கின்ற குதிரை வீரர்கள்; வேறு....செகுத்தனர் -
வெவ்வேறாக எதிர்த்துச் சினந்து ஒருவரை யொருவர் கொன்றனர்.
|
(வி-ரை) சூறை மாருதம் - சூறாவளி; மிக்கவேகமாய் எறியும் சண்டமாருதம்;
வாயுவேகம் என உவமிக்கும் மரபுபற்றிக் கூறினார்.
|
எதிர் ஏறுபாய் - எதிர்த்துச் செல்லும் ஏற்றத்தினை மேற்கொண்டு பாயும்; ஏறு
- ஏறுதல்; முதனிலைத் தொழிற்பெயர்; ஏறு - பரி என்று வினைத்தொகையாகக்
கொள்ளினும் அமையும்.
|
பரிவித்தகர் - குதிரை வீரர். பரி - குதிரையினைச் செலுத்தும் வித்தை;
வித்தகம் - அறிவு. வித்தகர் - சதுரப்பா டுடையவர். “வித்தகர்க் கல்லா லரிது”
(குறள்).
|
தலைப்பெய்தல் - ஒரு சொல். கூடுதல் - முட்டுதல்.
|
பரிகளை ஆவி செகுத்தனர் என்றலுமாம்.
|
இப்பாட்டால் குதிரைப்போர் மூண்டநிலை கூறப்பட்டது. 22
|
| 3964. | மண்டு போரின் மலைப்பவர், துண்ட மாயிட வுற்றெதிர்,
கண்ட ராவி கழித்தனர், உண்ட சோறு கழிக்கவே. 23 |