விலை 64 காசு (22 கழஞ்சு 8 மஞ்சாடி)¹. குலோத்துங்கன் 23ஆம் ஆண்டில் ஒரு கங்கதலைவனால் வீரசோழன் மனைவியான தன்னுடைய மகளுக்கு நன்றுண்டாக விளக்குப் போடப்பெற்றது². மூன்றாம் குலோத்துங்கன் 8ஆம் ஆண்டில் திரிசூலக்காசு கோயிலுக்களிக்கப்பெற்றது³. 34ஆம் ஆண்டில் கங்க அரசியான அரியபிள்ளையால் இரண்டு விளக்கு தானம் செய்யப்பெற்றன⁴. கோராஜகேசரி வர்மன்-1, 7ஆம் ஆண்டில் இறைவி திருவுருவம் செய்யவும் ஒரு விளக்குக்கும் ஒரு பிராமணனால் 1700 குழி நிலமும் தூய்நாட்டில் மந்திரம் பேரவையினின்றும் 1700 குழி நிலமும் வாங்கப்பெற்றன⁵. 26ஆம் ஆண்டில் 4ஆம் விக்கிரமாதித்தனிடமும் 3-ஆம் ஜயசிம்மனிடமும் வெற்றி பெற்றமையும், கோயிலுக்கு விளக்கு பொருத்தியமையும் தெரிகிறது⁶. 7ஆம் ஆண்டில் மதுராந்தக கண்டராதித்தன் கோயிலுக்கு வந்தமையும் 1000 குடங்களால் அபிஷேகித்தமையும், வருமானத்தை ஆராய்ந்தமையும் குறிக்கப்பெற்றுள்ளன⁷.

கோராஜ இராஜகேசரிவர்மன்-1, 16ஆம் ஆண்டில் 700 குழிநிலம் சங்கரதேவனுக்கு விற்றமையும் அவன் அதைத் திருவைய ஈசுவரருக்களித்தமையும் தெரிகிறது⁸. கோராசகேசரிவர்மன் இராஜராஜதேவன் 20ஆம் ஆண்டில் 90 ஆடுகள் தானம்செய்தான். 3ஆம் ஆண்டில் தூய்நாட்டிலுள்ள குக்கனூர் கிராமத்தின் வருவாய்களைத் திருவல்லம் கோயிலுக்குக் கொடுத்தான்⁹. மகாவலி வாணராயனது பொன்படு குட்டத்திலுள்ள சில நிலங்களை ஒருவன் வாங்கி விளக்கிற்காகவும் படையலுக்காகவும் கொடுத்தான்¹⁰. வாணவித்தியாதரன் காலத்து விளக்கெரிக்க 20 கழஞ்சு பொன் கொடுக்கப்பெற்றது¹¹. விக்கிரமாதித்தன்-1, வேண்டுகோளின்படி மூன்று கிராமங்கள் (விடேல் விடுகு விக்கிரமாதித்த சதுர்வேதிமங்கலம்) தானம் செய்யப்பட்டன¹². வாணராயனது சகம் 810-ல் எட்கூரிலுள்ள ஒரு பார்ப்பனனால் காரநாட்டிலுள்ள வன்னிப்பேடு கிராமத்தாரிடம் 25 கழஞ்சு பொன் கொடுக்கப்பெற்று அதன் வட்டியிலிருந்து விளக்குப் போடப்பெற்றது¹³. சோழபூபன் மகனான வீரசம்பன் சகம் 1236 இல் அர்த்த மண்டபம் ஞானமூர்த்தி என்ற பெயருடைய துறவியாலும் பிருதா அரசனாலும் கட்டப்பெற்றது. மேலும் கருப்பக்கிருகமும் கட்டப்பெற்றது. (வீரசம்பன் படைத்தலைவனா? ஒருநாயகனா? ஊகிக்க வேண்டியுள்ளது)¹⁴. வாணவித்தியாதர ராஜன் என்கிற வாணராயன் விளக்கிற்கு நெய்யிட 25 கழஞ்சு பொன் வழங்கினான்¹⁵.

___________________________

¹ 5 of 1890, ² 300 of 1897, ³ 301 of 1897, ⁴ 303 of 1897, ⁵ 8A of 1890, ⁶ 9 of 1890, ⁷ 10 of 1890, ⁸ 11 of 1890, ⁹ 1415 of 1890, ¹⁰ 12 of 1890, ¹¹ 298 of 1897, ¹² 1A of 1890, ¹³ 1B of 1890, ¹⁴ 3 of 1890, ¹⁵ 77 of 1889.