திருஞானசம்பந்தர் புராணம்

சிறுத்தொண்ட ருடன்கூடச் செங்காட்டங்
     குடியில்எழுந் தருளிச் சீர்த்தி
நிறுத்தெண்டிக் கிலுநிலவுந் தொண்டரவர்
     நண்பமர்ந்து நீல கண்டம்
பொறுத்தண்டர் உயக்கொண்டார் கணபதீச்
     சரத்தின்கட் போகம் எல்லாம்
வெறுத்துண்டிப் பிச்சை நுகர் மெய்த்தொண்ட
      ருடன்அணைந்தார் வேத கீதர்.

அங்கணைந்து கோயில்வலங் கொண்டருளி
     அரவணிந்தார் அடிக்கீழ் வீழ்ந்து
செங்கண்அரு விகள்பொழியத் திருமுன்பு
     பணிந்தெழுந்து செங்கை கூப்பித்
தங்கள் பெருந் தகையாரைச் சிறுத்தொண்டர்
     தொழஇருந்த தன்மை போற்றிப்
பொங்கி எழும் இசைபாடிப் போற்றிசைத்தங்
     கொருபரிசு புறம்பு போந்தார்.
                                 -சேக்கிழார்.