(பொ - ரை) இவ்விதமாக மானதயாத்திரை மிகவும் செய்து
பெருமானாகிய கிறிஸ்தியேசுவுக்குப் பக்திசெய்கின்ற நண்பன் ஒருவன்
உளன். அவன் தூய்மையான ஜீவிய நடை கடைப்பிடித்த ஓர் சுகிர்தன்.
இந்தப் பெரிய உலகத்தினது மயக்கத்தை ஒழித்த சிறப்பையுடைய ஞானி.

 

எம்பி ரான்றிருச் சித்தமே எனதுபாக் கியமென் றும்பர் நாயகன் பணிபுரிந் தொழுகுமவ் வுரவோன் இம்ப ரோர்சிறை யிருந்துழி யோகநித் திரையில் தம்பி ரானருள் சமைத்தது தரிசன மொன்றை.  9

     (பொ - ரை) எம்பிரான் திருச்சிதமே யெனது பாக்கியமென்று
தேவனாயகனுக்குத் திருப்பணிவிடை புரிந்தொழுகும் அந்தமேலோன்
இவ்வுலகத்தில் ஓர் சிறைச்சாலையில் இருக்கின்ற காலத்தில் அவனுடைய
யோக நித்திரையில் ஒரு தரிசனத்தைத் தம்பிரானுடைய அருளானது
அவனுக்கு உண்டாக்கினது.

 

தன்ன கத்துளே தோன்றிய தரிசனந் தரணி மன்னு யிர்க்கிர க்ஷணைவழி மரபினை வகுக்கும் என்ன வுன்னித்தன் னினத்தருக் கெழுதுபா சுரமாப் பன்னு வேன்வெளிப் படையிலென் றூக்கினன் பகர்வான். 10

     (பொ - ரை) தன்னுடைய இருதயத்துக்குள்ளே தோன்றிய இந்தத்
தரிசனமானது உலகத்திலேயுள்ள நிலைபெற்ற ஜீவகோடிகளுக்கு
இரட்சணிய வழியின் தன்மையை வகுத்துக்காட்டும் என்று மனதிலே
நினைத்து, அதனைத் தன் இனத்தவருக்கு எழுதும் ஒரு பாசுரமாக
வெளிப்படையாய்ச் சொல்லுவேன் என்று உற்சாகமடைந்து சொல்லுவான்.

                           வரலாற்றுப்படலம் முற்றிற்று
                           ----------------------------------