‘வெறும் அவன் படியையோ பார்ப்பது! அருகே இருக்கிறார் படியையும் பார்க்க வேண்டாவோ? ¹‘குற்றம் செய்யாதவர் ஒருவரும் இலர்,’ என்பவர் அன்றோ அருகில் இருக்கிறார்?’ என்கிறார்.

    தருமம் - இப்பொருளில் ஐயம் இன்று. அவ்வரும்பயனாய - பெறுதற்கு அரிதாகச் சாத்திரங்களிலே பிரசித்தமான பிரயோஜன ரூபமானவற்றை. இனி, ‘பயனாய’ என்பதனை வினையாலணையும் பெயராகக் கொள்ளாது, பெயரெச்சமாகக் கொண்டு, திருமகளுக்கு அடைமொழியாக்கி, தருமத்தினுடைய மேலான பிரயோஜனந்தான் ஒருவடிவு கொண்டாற்போன்று இருக்கின்ற பெரிய பிராட்டியார் என்று பொருள் கூறலும் ஒன்று. திருமகளார் தனிக்கேள்வன் - பெரிய பிராட்டியாருக்குக் கணவன் ஆகையாலே ²இரண்டாம் விரலுக்கு ஆள் இல்லாதபடி இருக்கிறவன். ³சனக குலத்தில் அவதரித்த பிராட்டியானவள் எவனுக்கு மனைவியாக இருக்கின்றாள்? அவனுடைய திறல் வலி முதலாயின அளவிட முடியாதனவாக இருக்கின்றன,’ என்கிறபடியே. திருமகள் கேள்வன் ஆகையாலே வரும் ஏற்றம் உள்ளது இவன் ஒருவனுக்குமே ஆதலின், ‘தனிக் கேள்வன்’ என்கிறார். பெருமையுடைய பிரானார் - இலட்சுமிபதி ஆகையாலே வந்த மேன்மையுடைய உபகாரகர் ஆனவர். அடியார்கட்கு அருள் புரிதலே சொரூபமாகவுடையவர் ஆதலின், ‘பிரானார்’ என்கிறார். இருமை வினை கடிவார்-⁴பேர்வாசியேயாம்படி நாம் செய்து வைத்த இருவகைப்பட்ட கர்மங்களையும் போக்குவார். நல்வினை தீவினைகட்குத் தம்மில் தாம் வேற்றுமை உண்டேயாயினும், ⁵மோட்சத்திற்குத் தடை என்னும் தன்மையில் இரண்டு வினைகளும் ஒக்கும் ஆதலின், ‘இருமை வினை கடிவார்’ என்கிறார்.

(9)

1. ஸ்ரீராமா. யுத். 116 : 45.

2. ‘அதிரதர் தம்மை எண்ணில் அணிவிரல் முடக்கல் ஒட்டா முதிர்சிலை
  முனியும்’ (வில்லிபா. நிரைமீ. 92) ‘வில்லாளரை எண்ணில் விரற்கு முன்
  நிற்கும் வீரன்’ (கம். யுத். 1956.) என்பன இப்பொருள் பற்றி வந்தன.

3. ஸ்ரீராமா. ஆரண். 37 : 108.

4. ‘பேர் வாசியேயாம்படி’ என்றது - புண்ணியம், பாவம் என்கிற பேர்வாசி
  மாத்திரமேயாம்படி என்றவாறு.

5. ‘நல்வினையும் பிறவிக்குக் காரணமாதலின், ‘இருவினையும் சேரா’ என்றார்,’
  என்ற பரிமேலழகருரை இங்கு ஒப்பு நோக்குக.