பொ-ரை : ‘அடிமையாய்ப் புகுந்து சிவபிரானாகிய தன்னைக் கண்ட மார்க்கண்டேயனைச் சிவபிரானும் ஆபத்துக்காலத்தில் காப்பாற்றியது நாராயணனுடைய திருவருளாலேயாம்; கொக்கைப் போன்று வெண்மை நிறத்தோடு மலர்கின்ற பெரிய தாழைகளை வேலியாகவுடைய திருக்குருகூர் என்னும் திவ்விய தேசத்திலே மேன்மையையுடைய ஆதிப்பிரான் நின்ற திருக்கோலமாய் எழுந்தருளியிருக்க, வேறு தெய்வங்களைப் பற்றிப் பேசுகின்றீர்களே! உங்கள் அறிவின்மை இருந்தவாறு என்னே!’ என்கிறார்.

    வி-கு : ‘அடிமையினால் புக்குத் தன்னைக் கண்ட மார்க்கண்டேயன்’ என்க. ‘தன்னை’ என்றது, சிவபெருமானை. நக்கன் - வஸ்திரமில்லாதவன்; சிவபிரான். ‘திகம்பரன்’ என்றபடி. அருளே - ‘அருளாலே’ என்று மூன்றாம் வேற்றுமை விரிக்கவும். கொக்கு - ஒரு பறவை, மாமரமும் ஆம்.

    ஈடு : எட்டாம் பாட்டு. ¹‘இங்ஙனே இருக்கச்செய்தேயும், மற்றைத்தேவனாகிய சிவபிரானை வணங்கி அன்றோ மார்க்கண்டேயன் தான் விரும்பிய பயனைப் பெற்றது?’ என்ன, ‘ஆகில், இருந்தபடி கேட்கலாதோ?’ என்கிறார்.

    புக்கு அடிமையினால் - அடிமையினால் புக்கு; என்றது, ‘சர்வேசுவரனுக்கு அடிமை என்று புக்கான் அல்லன்; ‘உருத்திரனுக்கு அடிமை’ என்று புக்கான்,’ என்றபடி. ²தன்னைக் கண்ட - காணப் பெறாமையாலே தான் இழந்தான் அல்லன். ஆக, ‘போற்றி வணங்கிய தன்மையில் குறையினாலே இழந்தான் அல்லன்; காணப் பெறாமையாலே இழந்தான் அல்லன்,’ என்றபடி. மார்க்கண்டேயன் அவனை - மார்க்கண்டேயனானவனை. ³நக்கபிரான் - நக்கன் - நக்நன். ‘பிரான்’ என்கிறார், தன்னுடைய கோஷ்டிக்கு உபகாரகனாய் இருக்கையாலே. அன்றிக்கே, ⁴ஞானத்தினைக்

_____________________________________________________

1. முன் பாசுரத்தில் கூறிய பொருளையும் கடாக்ஷித்து அவதாரிகை
  அருளிச்செய்கிறார். ‘இங்ஙனே இருக்கச் செய்தேயும்’ என்றது, ‘மற்றைத்
  தெய்வங்கள், பிறப்பு இறப்புகட்குக் காரணர்கள், சர்வேசுவரனே மோக்ஷத்தைக்
  கொடுக்கக் கூடியவன்,’ என்று பிரசித்தி உண்டாயிருக்கச்செய்தேயும்’ என்றபடி.

2. தன்னை - சிவபிரானை.

3. நக்கன் - சிவன். ‘நிர்வாணமாக உள்ளவன்’ என்பது பொருள்.

4. ‘ஞானத்தினைக் கொடுக்கக் கூடியவன்’ என்றது, ‘சிவபிரானிடமிருந்து
  ஞானத்தை விரும்ப வேண்டும்’ என்ற பிரம்மாண்ட புராண வசனத்தை
  நோக்கி. 430ஆம் பக். காண்க.