அம்பரம் - ஆகாயம். வெங்கதிர் - ஞாயிற்றின் கதிர். "நிறைவெண் கொடிமாடம்" என்பது இத்தலத் தேவாரம். "வெண்கொடி" (243) என்றதும் ஆண்டுரைத்தவையும் பார்க்க. கொடிகள் - மாடங்களின் உயர்ந்த ஆடரங்குகளில் ஆடும் பெண் கொடிகளையும் குறிப்பாலுணர்த்துவதாம். "மாடந்தோறுங் கோதைசூ ழளக பாரக் குழைக்கொடி யாட மீது சோதிவெண் கொடிகளாடும்" (474) என்றது இங்கு நினைவு கூர்தற்பாலதாம். பெண்கள் ஆடுதல் ஆண்டவன் விழவின்பொருட்டும், அடியார் வருதலாகிய சிறப்பின் பொருட்டுமாம்.

குலவும் - விளங்கும்; விளங்கச் செய்யும் என்றலுமாம். "குலாத்தில்லை", "குலாப்பத்து" , "குலாவு பாதம் விளக்கியே" (443) பார்க்க.

ஞாலம் திகழ் - உலகத்தை விளங்க வைக்கும். ஈடேற்றும் என்க.

முனிவர்கள் - தில்லை மூவாயிரவரும், பதஞ்சலி, வியாக்கிரபாதர், சைமினி, வியாசர், சுகர், சூதர் முதலியோரும்.

ஓலம் பெருகிய - ஓலம் - ஒலி. ஓலம் - அபயம் - என்று கொண்டு கூவியடையும் குரல் என்றலுமாம்.

நிலை ஏழ் கோபுரம் - ஏழ்நிலைக் கோபுரம். இது மேற்குவாயிற் கோபுரம்.

மெய் உற என்க. உறுதல் - நிலம் பொருந்துதல். கொடு - பணிந்துகொண்டு.

உள் - திருக் கோயிலுக்குள்ளே.

முறையே தொழுது - என்பதும் பாடம்.

164

165

(இ-ள்.) வளர்...வலம் - வந்து - அழகு வளர்கின்ற மேகங்கள் சூழ்கின்ற திருமாளிகையை வலமாக வந்து; அலமரும்வரை நில்லா...விரவ - வருத்தம் தருகின்றதும் வரையறையின்படி நில்லாத அளவிற் பெருகியதுமாகிய ஆர்வத்தினிடை எழுகின்ற அன்பாகிய கடல்நிறைந்த திருமேனி முழுதும் மயிர்ப்புளகம் மிகுந்து ஒழுங்குபடக கலக்க; திருமலி...புகுவார் - திருமிகுந்த பொன்பூண்ட கோபுரத்தினுள்புகும் நாயனார்; முன்....கண்ணுற்றார் - முன்பு, கழுத்தில் விளங்குகின்ற விடத்தினை யுடையவராகிய அருட்கூத்தப் பெருமான் நடமாடுகின்ற பொன்னம்பலத்தை எதிா கண்ணுற்றனர்.

(வி-ரை.) பொன்வளர் திருமாளிகை - என்று கூட்டுக. திருமாளிகை என்பது திருமாளிகைப்பத்தி எனத் தில்லையில் திருமதிலை அடுத்துக் கோயிலினுள் உள்ள அமைப்பு. பொன்வளரர் - அநபாயச் சோழராசராலும், அவரது முந்தையோராலும் பொன் வேய்ந்து அணிசெய்யப்பட்ட என்ற குறிப்புமாம். "தில்லைத் திருவெல்லை, பொன்னின் மயமாக் கியவளவர் போரேறு" (சண்டீசர் - புரா - 8) பார்க்க. ¹திருமாளிகை - திருக்கோயில் என்றலுமாம்.