முறையே இறைவனது வலக்கண்ணும் இடக்கணணுமாவன. தன்கண் கோப்பதும் - தமது கண்களை இடந்தும் இடத்தலுற்றும் முயன்றவுடனே; பற்றி - "ஏறுயர்த் தவர்தங் கையாற் பிடித்துக்கொண்டு" (829). கொண்டார் - தம் வலத்தில் நிற்கவைத்துக் கொண்டனர். - (8) மாவலி சரிதம். மாவலி முன் பிறப்பில் எலியாயிருந்த காலம் கோயில் விளக்கில் நெய்யுண்ணப் புக்கபோது சுடர் மூக்கினைச் சுடவே, நுந்துதலினால் திரிமூண்டெரிய அப்புண்ணியத்தால் மாவலிச் சக்கரவர்த்தியாய்ப் பிறந்து உலகாண்டனன் என்பது வரலாறு. மண்ணும் - விண்ணும் - வானுலகம் - மூவுலகாட்சி. இதனால் விட்டுணு மாவலிபால் மூவடிமண் இரந்த சரிதமும் கேட்கப்படும். - (9) கணம்புல்ல நாயனார் சரிதக் குறிப்பு. அருந்தவத்த - தவத்தினையுடைய. புராணம் பார்க்க. - (10) இராவணன் சரிதம். பதிகமுழுதும் அவ்வவர்க்கருளும் சிவனது சரிதங்கள் பற்றிய கருணைத்திறங்களே போற்றப்பட்டன.

II திருச்சிற்றம்பலம்

திருநேரிசை

2

திருச்சிற்றம்பலம்

பதிகக்குறிப்பு :- சிவனருள் செய்யும் திறம்.

பதிகப்பாட்டுக் குறிப்பு - இத்திருப்பதிகத்துள் இரண்டு பாட்டுக்களே கிடைத்துள்ளன. - (1) பிலயம் - பிரளயம் என்பது பிலயம் என நின்றது; ஊழி. கொள்ள - கொள்ளுமளவும். அடி - முடி - நிரனிறை. தூய மந்திரங்கள் - சிவமந்திரம். பாசு பதப்படையினை ஏவுங் காலத்துச் சொல்லலாவது. - (2) சோத்தம் - இழிந்தோர் செய்யும் அஞ்சலி. தீர்த்தமாம் அட்டமி - தீர்த்த விழா அட்டமிநாளில் வரும்படி முன் ஏழுநாள் பிரதமைதிதி தொடங்கி விழாச்செய்தல். கூத்தராய் வீதிபோந்தார் - திருவீதியில் எழுந்தருளினார். விழாச் சிறப்புக்கூறிய இடம் இப்பதிகம்.

தலவிசேடம் :- திருக்குறுக்கை - காவிரிக்கு வடகரையில் 26-வது தலம். சுவாமி - வீரட்டேசுவரர்; அம்மை - ஞானாம்பிகை. இது நீடுர் புகைவண்டி நிலையத்தினின்றும் வடமேற்கே மட்சாலையில் மூன்று நாழிகையளவில் அடையத்தக்கது. அன்னியூரின் (22-வது தலம்) வடமேற்கே மட்சாலையில் மூன்று நாழிகையளவில் ஐயாவையன் வாய்க்காலுக்கு மேல் பக்கமாய் 1/2 நாழிகையளவில் உள்ளது.

நின்றியூர்

திருச்சிற்றம்பலம்

திருக்குறுந்தொகை

1

திருச்சிற்றம்பலம்

பதிகக்குறிப்பு :- நின்றியூர் இறைவர் கூற்றுதைத்த கருத்தர்; அவர் கள்வர்; உரிபோர்த்த பரமர்; பெருஞ்செல்வர்; பிறைசூடிய கூத்தர்; அவரைப் பற்றினாரை வினையும் பாவமும் பற்றா; தொழுவார் வினை ஓடும்; அஞ்சியாகிலும் அன்பு பட்டாகிலும் அவரை நெஞ்சே நினை.