இது பதின்சீர்க் கழிநெடிலடியால் வந்த ஆசிரியவிருத்தம்.
535. முயக்கு - தழுவுதல். களம் - கள்ளம்; பொய்ம்மை; களங்கு உலாம் என்று பிரித்துக் களங்கென்பதற்குக் களங்கம் (குற்றம்) எனப் பொருள் கொள்ளுதலும் ஒன்று. இறந்துபோய் இடுகாடு சேர்முனம். தழங்க - ஒலிப்ப. அணி பூதியான் - திருநீற்றை அணிந்தவர். அடுத்த பாசம் - நம்பால் அநாதியாகப் பொருந்திய பாசம்.
536. கைத்தலத்தில் அழலையும் கணிச்சியையும் வைத்து; கணிச்சி - மழு. கட்கடைப்படைக்கு இளைத்த - கடைக்கண்ணாகிய படைக்கலத்திற்கு வலியிழந்த. தாம் சிறந்த படைக்கலத்தை யுடையவராக இருந்தும் ஒரு பெண்பாலின் கட்படைக்கு இளைத்தாரென்றது ஒரு நயம். முத்தலைப் படை - திரிசூலம். எம் அத்தர். முக்கண் நக்கர்; நக்கர் - திகம்பரர். நித்திலத்தினைப் பதித்த கச்சு - முத்தாலாகிய கச்சு (527). வேள் - காமன். நெடு அயில் கண் நித்திலக் கண் உற்றிடச் செய்விக்கும் - நீண்ட வேல் போன்ற கண்ணைக் கண்ணீர்த் துளிகளாகிய முத்துக்களையுடைய கண்ணாக அமையச் செய்விக்கும்; அழும்படி செய்விக்குமென்றபடி. செய்விக்கும் அதுதான் நக்கருக்கு ஒருத்தர் மொழியாரோ; அது - அத்துன்பத்தை.
இச் செய்யுள் தலைவி இரங்கல்.