காரியம் போலும் விளைகின்ற மயக்கத்தினை விட்டு நீங்குவது எந்நாளோ? தோன்றி மறையுந் தன்மைக்கு இந்திரசால மொப்பாகும்.

(7)

ஆழ்ந்து நினைக்கின் அரோசிகமாம் இவ்வுடலில்

வாழ்ந்துபெறும் பேற்றை மதிக்குநாள் எந்நாளோ.

    (பொ - ள்.) கூர்ந்து நாடினால் இவ்வுடல் அருவருக்கத் தகுந்த தன்மையுடையதாகும். இவ்வுடலில் தங்கியிருந்து பெறுதற்குரிய திருவடிப்பேறாம் பெரும் பேற்றினை அணைய அருளால் நினைக்குநாள் எந்நாளோ?

(8)

மும்மலச்சே றான முழுக்கும்பி பாகமெனும்

இம்மலகா யத்துள் இகழ்ச்சிவைப்ப தெந்நாளோ.

    (பொ - ள்.) ஆணவங் கன்மம் மாயை என்னும் மும்மலமாகிய சேற்றினால் விளைந்த முழுக்கும்பி பாகமென்னும் நரகத்தினை யொத்த இம் மாயாகாரிய உடலகத்து வெறுப்பினை அடைவது எந்நாளோ?

(9)

நாற்றமிகக் காட்டு நவவாயில் பெற்றபசுஞ்

சோற்றுத் துருத்தி சுமைஎன்ப தெந்நாளோ.

    (பொ - ள்.) தீநாற்றம் மிகக்காட்டும் ஒன்பது தொளைகளையுடைய பசிய சோற்றுக்குவியலைத் திணிக்கும் தோற்பையினைப் பொறுக்காலற்றாச் சுமை யென்ப தெந்நாளோ?

(10)

உருவிருப்ப வுள்ளேதான் ஊறும் மலக்கேணி

அருவருப்பு வாழ்க்கையைக்கண் டஞ்சுநாள் எந்நாளோ.

    (பொ - ள்.) புறத்தே தோற்றத்தில் அழகாக இருக்கவும், அகத்தே மலமானது கேணிநீர்போல் ஊற்றெடுத்துப் பெருகி வழிதலால் இவ்வுடம்பொடு கூடிய வாழ்க்கை அருவருக்கத் தக்கதென்று உய்த்துணர்ந்து கண்டு அஞ்சுநாளெந்நாளோ?

(11)

5. மாதர் மயக்கறுத்தல்

மெய்வீசு நாற்றமெலாம் மிக்கமஞ்ச ளால்மறைத்துப்

பொய்வீசும் வாயார் புலையொழிவ தெந்நாளோ.

    (பொ - ள்.) மெய்யின்கண் உண்டாகின்ற தீநாற்றமனைத்தையும், மிகுந்த மஞ்சளைப்பூசி மறைத்து, நம்பும்படியாகப் பொய்களைப் பேசித் திரியும் வாயினை யுடையராகிய மையல் மாதர்தம் பொல்லாங் கினை நீங்குவது எந்நாளோ?

(1)

திண்ணியநெஞ் சப்பறவை சிக்கக் குழற்காட்டில்

கண்ணிவைப்போர் மாயங் கடக்குநாள் எந்நாளோ.

    (பொ - ள்.) திடமான மனமென்னும் பறவை எளிதாக வந்து அகப்பட்டுக்கொள்ளும்படி, கூந்தலாகிய காட்டில் நறுமண மாலையாகிய