:: TVU ::

பக்கம் : 77

11. ஏடு பெற்ற காதை
பொழிலில் பூங்கொடி

	தாமரைக் கண்ணி தவிர்ந்த பின்னர்த் தோமறு தமிழ்க்குத் தொண்டுகள் ஆற்றப் பூமியிற் பிறந்த பூங்கொடி ஒருநாள் பொழில்நலங் காணும் விழைவினள் செல்வுழி,

	மூதாட்டி வருகை

	மழைமுகங் கண்ட மயிலென ஒருத்தி	5
	நரைமூ தாட்டி நல்லன எண்ணிப் புரையறு செயலே புரிவது காட்டும் முகத்தினள், கல்வி முற்றிய அறிவினள், அகத்தினில் அன்பு நிறைந்தவள் ஆங்கே
	எதிர்ப்பட் `டாயிழாய் யார் நீ?' எனலும்,	10

	பூங்கொடி தன் வரலாறு கூறல்

	`முதிர்பரு வத்தாய்! மொழிகுவென் கேளாய்! உலகந் தோன்றி ஊர்ந்து வளர்ந்து பிள்ளைப் பருவத்துப் பேசிய மொழியாம் வெல்லத் தமிழ்மொழி வெல்லப் பணிபுரிந்
	தறிவொளி விளங்க ஆற்றினர் தந்தை;	15
	குருடு படுமதிக் குழுவினர் சதியால் மாண்ட வடிவேல் மனைவிளக் கருண்மொழி ஈன்ற மகள்யான் என்பெயர் பூங்கொடி,

	இல்லறம் தவிர்ந்தமை கூறல்

	தனித்தொரு மகள்இத் தரணியில் வாழ
	நினைத்தல் பலபிழை நிகழ்வதற் கேதென	20
	உலகம் மொழிதல் உண்மையே யாயினும்
---------------------------------------------------------------
	தவிர்ந்த - நீங்கிய, புரை - குற்றம், ஆயிழாய் - பூங்கொடி, ஆற்றினர் - செய்தனர்.