பின்னிணைப்பு II

வாய்ச்சைகை யொலிகளில் சுட்டாவொலிக்கு எடுத்துக்காட்டாக ஒன்றை இங்குத் தருவாம்.

உம் என்னும் சொல்

குவிதற் கருத்து : உகரத்தை ஒலிக்கும்போது உதடு குவியும். மகரத்தை யொலிக்கும்போது வாய் மூடும். ஆகவே, உம் என்று ஒலிக்கும்போது வாய் குவிந்து மூடும். இது பேசா நிலையையும் குவிவையுங் குறிக்கும். பேசாதிருப்பவனை உம்மென்றிருக்கிறான் என்பது வழக்கு.

உம் - ஊம் (பொ.பா.). வாய் குவிந்த (வாய் மூடின) ஆள், பேசாத ஆள். ஊம் - ஊமன் (ஆ. பா.) ஊம் - ஊமை (பொ. பா.).

உம் - உமி - உமிழ் = வாய் குவிந்து துப்பு. உம் - உம்பு - உம். பல் = குமிழ். உம் - உமி = குவிந்த கூலவுறை.

உம் - கும் = குவி, கூடு, திரள். கும் + அல் - கும்மல்.

L. cumulus, a heap.

கும்மலிடு. L. cumulatum, E. cumulate.

கும்ம = கூட. L. com, cum, sim; Skt. sam, Gk. ham, syn; E. com, con, syn (pfxs.), together (to gether), Gk. hama, together.

கும்மி = கைகுவித்துக் கொட்டும் கூத்து. கும்மி - குப்பி - கொப்பி. குமுதம் = பகலிற் குவியும் பூ. கும்மு = ஆடையைக் கைகுவித்துத் துவை. குமை = துவை. குமுக்கு = கை குவித்துக் குத்து, ஆடையைக் கும்மு. குமுங்கு = குத்துண்டு மசி.

கும் - குமர் = திரட்சி, இளமை, இளம்பெண், அழியாமை. குமர் + அன் - குமரன் - குமாரன் (வ.); குமர் + இ - குமரி - குமாரி (வ.).

ஒ.நோ: விடை = பருத்தது, இளம்புள், இளவிலங்கு; விடை - விடலை = இளங்காளை, இளைஞன், மறவன் (வீரன்).

Cf. E. virgin. from Gk. orgao, to swell.

குமரன் = இளைஞன், முருகன், மகன். குமரி = இளைஞை, காளி, மகள். கும்மிருட்டு = திண்ட இருள்.

கும் - குமி - குவி. குவி - குவ - குவவு = திரட்சி. குவ - குவல் - குவால் = குவியல். குவி - குவடு - கோடு = குவிந்த சிகரம், மலை. குவி - குவை - குகை = உட்குவிவு.