மாற்றமாடு என்னும் வினை

மாற்றம்=சொல். ஆடு என்பது ஒரு துணைவினை

மாற்றமாடு=சொல்லாடு, உரையாடு, பேசு.

மாற்றம்-மாட்ட(தெ.). மாற்றமாடு-மாட்டாடு(தெ.) மாத்தாடு (க.)

கள் என்னும் பன்மையீறு தெலுங்கில் கலு-லு என்று திரியும்.

மாட்டலு (மாற்றங்கள்)+ஆடு=மாட்டலாடு-மாட்லாடு

சில தெலுங்குச் சொற்கள் அடிப்படை யெழுத்துகளுள் ஒன்று தொக்கு வழங்குகின்றன.

எ-டு:

அழுத்து-அத்து, இலுப்பை-இப்பு, உருக்கு-உக்கு, கொழுப்பு கொவ்வு, செருப்பு-செப்பு, திருத்து-தித்து, சுருட்டு-சுட்டு, நெருப்பு-நிப்பு, பருப்பு-பப்பு, பெருத்த-பெத்த, மருந்து மந்து, விருந்து-விந்து.

உருண்டை, ஒருத்தன் என்னுஞ் சொற்கள் உண்டை, ஒத்தன் என்று தமிழிலும் திரிந்திருப்பினும், அவற்றின் திருந்திய வடிவுகளும் வழக்கில் உள. தெலுங்கில் அங்ஙனமன்று.

சில தெலுங்குச் சொற்களின் முதலிலுள்ள உயிர்மெய்யிடை ரகரஞ் செருகப்படும்.

எ-டு:

பொழுது-ப்ரொத்து (தெ.), மண்டு-ம்ரண்டு (தெ.). மண்டுதல் எரிதல்.

இவ் வழக்கே, தமிழ்-த்ரமிள (வ.), படி-ப்ரதி (வ.), பதிகம்-ப்ரதீக (வ.), மதங்கம்-ம்ருதங்க (வ.), மெது-ம்ருது (வ.) என வடசொற் றிரிவுகட்கு வழிவகுத்தது.

பல மென்றொடர்ச்சொற்கள் தெலுங்கில் வல்லோசை பெறும்.