ஆயினும், தியூத்தானியத்தை மட்டும் தனிப்பட நோக்கின்,
பொதுவகையில் திரிந்த த - ச - ஹ முறை சிறப்பு வகையில்
மீண்டும் ஹ - ச - த எனத் தலைகீழாக ஒருசில சொற்களில்
மாறியுள்ளதாகத் தெரிகின்றது.

     இங்ஙனம், வேறுபட்ட மொழிகளில் எதிர்வழிப் போக்காகச்
சொற்றிரிபு நிகழ்வதும் இயல்பே. இனி, இத் தலைகீழ்ச் சொற்றிரிபு
இலக்கிய வழக்கிற்கேயுரியது எனலும் ஒன்று.

     (7) தன்மையிடப் பெயர் ஏகார வடியினின்றும், முன்னிலை
யிடப் பெயர் முன்மைச் சுட்டாகிய ஊகார வடியினின்றும், படர்க்கைச்
சுட்டுப் பெயர் சேய்மைச் சுட்டாகிய ஆகார வடியினின்றும்
தோன்றியுள்ளன வென்னும் அடிப்படையுண்மை யுணரின், ஆரிய
மூவிடப் பகரப் பெயர்களின் (pronouns) திரிமுறையை எளிதில்
அறிந்துகொள்ளலாம்.