ஜா என்னும் இந்தி வினை இறந்தகாலத்தில் கயா (gaya) என்றே
புடைபெயரும்.

     சகரம் ககரமாவது போல் ஜகரம் 'g' ஆகும். இந்திக்கு மூலமான
சூரசேனியில் ஜா என்னும் இந்தி வினை ஏ அல்லது யா என்றே
வழங்கியிருக்கலாம்.

     தியூத்தானியத்தில் ஜா என்னும் போதல் வினை ga எனத் திரியும்.
OS., OE. gan, OHG. gan, gen, E. go. ஆ ஓவாகத் திரிதல்
தமிழிலுமுண்டு.

     எ-டு: பெரியார்- பெரியோர், ஆம் - ஓம்.

     "ஓமோமென வோங்கிய தோர்சொல்" (திருவாலவா.38:4)

     தமிழில் யகரம் சகரமாகவும் சகரம் ககரமாகவும் திரிதல் போல், திரவிட
மொழிகளிலும் வடநாட்டு மொழிகளிலும் ஆரிய மொழிகளிலும் யகரம்
ஜகரமாகவும் ஜகரம் 'g' ஆகவும் திரிகின்றன.

     உய் என்னும் தமிழ்வினை வேத ஆரியத்தில் அய் என்று திரிந்து
வழங்குகின்றது.

     இய் என்னும் தமிழ்வினை ஆரிய மொழிகளில் இ என்று குறுகி
வழங்குகின்றது.