|
| முல்1 (இளமைக் கருத்துவேர்) |
| இளமை என்பது ஓர் உயிரியின் பிறப்பிற்கும் முழு வளர்ச்சிக்கும் இடைப்பட்ட நிலைமை அல்லது காலம். அது பிறந்த நிலையினின்று தொடங்கி, புனிற்றிளமை, சிற்றிளமை, பேரிளமை என முந்நிலைப்பட்ட தாகும். |
| பிறப்பெனினும் தோற்றமெனினும் ஒக்கும். |
| இயற்கையான தோற்றம் அல்லது இயக்கமெல்லாம் முன்னோக்கியே நிகழ்தலால், தோற்றக் கருத்தில் முன்னோக்கல் அல்லது முகங்காட்டற் கருத்து இரண்டறக் கலந்துள்ளது. |
| இனி, இளமைப் பருவத்திலேயே உருவச் சிறுமையும் உடல் மென்மையும் அழகு நிறைவும் மறவுணர்ச்சியும் வலிமை மிகுதியும் பொதுவாக அமைந்திருத்தலால், இளமைக் கருத்திற் சிறுமை மென்மை அழகு மறம் வலிமை முதலிய கருத்துகளும் தோன்றும். |
| முல் - முன் - முனி = யானைக் கன்று. "முனியுடைக் கவனம் போல்"(நற்.360). |
| முன் - முன்னி = முல்லை நிலத்தில் இயற்கையாக விளைவும் ஒரு சிறு பயறு. |
| ஒ.நோ: L. Min, small. இதனின்றே, minify, minim, minimum, minish, minor, minute முதலிய பல சொற்கள் திரிந்துள்ளதாகத் தெரிகின்றது. |
| முல் - முள் - முளை = 1. வித்தினின்று முளைத்த சிறு வெளிப்பாடு. "வித்திய வெண்முளை" (ஐங்குறு. 29). 2. இளமை. "முளையமை திங்கள்" (கம்பரா. கும்பக. 10). 3. மரக்கன்று. "அதன்றாள் வழியே முளையோங்குபு" (சீவக 223). 4. சிறுபிள்ளை. 5. மகன். (பிங்.) |
| ம. முள, து.முளெ, க.மொளெ, தெ. மொலக்க. |
| முளைத்தல் = 1. முளை தோன்றுதல். "ஒன்றாய் முளைத்தெழுந்து" (திருவாச. 10 : 8). 2. கதிரவன் தோன்றுதல். "காலை ஞாயிறு கதிர்விரித்து முளைப்ப" (மணி. 8 : 18). |
| ம. முளை, க.மொளெ, தெ. மொலத்சு. |
| முளை - முளையான் = சிறுகுழந்தை. இந்த முளையான் பேச்சை யார் கேட்கிறது. (W.) |
| முள் - முளு - முசு - மூசு = பிஞ்சு. பலாமுசு. (உ.வ.). ஒ.நோ: உளு - உசு. ள - ச. போலித்திரிபு. |