இலை - இலக்கு = வித்தின் முளையூன்றியபின் வரும் முதல் இலைகள்.

இல் - இள் - இள. இளத்தல் = மெல்லிதாதல்.

உடம்பு இளந்துவிட்டது என்னும் உலக வழக்கை நோக்குக,

இளமை = மென்மை, இளம்பருவம், அறிவு முதிராமை.

இளகு - இளகுதல் = மெல்குதல், நெகிழ்தல், உருகுதல். ம. இளகு.

இளகு - இளக்கு - இளக்கம். ம. இளக்கம்.

இளகு - இளஃகு. இளஃகுதல் = தளிர்த்தல்.

“இன்னுயிர் ............ இளஃகுமே”     (சீவக. 149)

இளக்கரித்தல் = தளர்தல், வேகந்தணிதல், கருமத்தில் யிருத்தல்.

இளக்கரி - இளக்காரம் = கழிகண்ணோட்டம், மனநெகிழ்ச்சி, மதிப்பின்மை.

இளப்பம் = மதிப்புக் குறைவு, தாழ்வு. ம. இளப்பம்.

இளவல் = தம்பி, இளைஞன், முற்றாதது.

இளங்கிளை = தங்கை.

“மாலவற் கிளங்கிளை”      (சிலப். 12 68)

இளந்தலை = இளைமை, எளிமை, கனமின்மை, முற்றா மரப் பகுதி.

இளந்தை - இளைமை.

இளந்தாரி = இளைஞன், இளைஞை.

இளந்தேவி = இளவரசி.

இளமட்டம் = இளைஞன். இளமட்டம் - இளவட்டம்.

இளம்படியர் = இளம்பெண்கள்.

“வாணிளம் படியர்”      (திவ். பெரியாழ். 3 6 3)

இளங்கேள்வி = உதவிக் கோயிற் கண்காணியர்.

இளங்கோ = இளவரசன்.

இளங்கொற்றி = ஈன்றணிமை ஆவு.

இளங்கதிர் = எழுஞாயிற்றின் கதிர். ம. இளங்கதிர்.