ஒ.நோ. இல்லது - இல்லாது = இல்லாமல்.

அல்லது என்னும் ஒன்றன்பால் குறிப்புவினைமுற்றுச் சொல், அன்மையுருபான பின், பிற பால்களையும் உணர்த்துவது வழு வமைதியாம்.

எ-டு. தந்தை அல்லது தமையன்.

முதற்காலத்தில் ஒன்றன்பாற் சொல்லாகவே யிருந்த உண்டு (உள்ளது) என்னும் குறிப்பு வினைமுற்று, இன்று இருதிணை யைம்பால் மூவிடப் பொதுவினையாய் வழங்குதலை நோக்குக. உள் + அது = உள்ளது. உள் + (அ) து = உண்டு.

அல்+அது = அல்லது. அல்+(அ)+து = அன்று.

iii. தொகுதல் (மறைதல்)

தொங்கற் கருத்தினின்று தொகுதற் கருத்துத் தோன்றும். இரு சொற்கிடையில் வேறொரு சொல் மறைந்து நிற்பது தொங்கிநிற்பது போன்றது.

தொகு - தொகை - தோகை = தொங்கும் கரும்பு சோளம் முதலிய வற்றின் தாள், தொங்கும் மயிற்பீலி.

தொகுதல் = தொங்குதல், குறைதல், மறைதல்.

உருபு தொகுதல் = உருபு மறைதல். தொக்கு நிற்றல் - மறைந்து நிற்றல்.

தொகு - தோகை.

வேற்றுமைத்தொகை வினைத்தொகை முதலிய ஐவகைத் தொகைகளையும் நோக்குக.

மறைதலைக் குறிக்கும் தொகு என்னும் சொல்லும், குழு முதலைக் குறிக்கும் தொகு என்னும் சொல்லும், வெவ்வேறாம். முன்னது மேற்செலவியலையும் பின்னது கூடலியலையும் சார்ந்தன வென அறிக.

பல சொற்கட்குப் பல பொருளுண்டு. அவை, முதற் பொருளும் வழிப்பொருளும் சார்புப் பொருளுமாக, முறையே ஒன்றையொன்று பிறப்பித்துக் கோவைப்பட்டு நிற்பன. அவற்றுள் எப்பொருளிலேனும் அவற்றை ஆளலாம். ஆளப்பட்ட பொருள் முதலா வழியா சார்பா என்பது மொழியாராய்ச்சியாளருக்குத்தான் தெரியும். பிறர் அதனை