ஒருபொருட் பல சொற்கள் எம்மொழியிலும் ஒரு பொருட்குப் பல சொற்களிருப்பின், அவை யாவும் பருப்பொருளில் ஒத்திருப்பினும்நுண்பொருளில் ஒத்திரா. ஆகவே, ஒருபொருட் பலசொற்களெல்லாம் நுண்பொருள் வேறுபாட்டை யுடையன. “ கவையாகிக் கொம்பாகிக் காட்டகத்தே நிற்கும்’’ (மூதுரை, 13) “ கோக்கண்டு மன்னர் குரைகடல் புக்கிலர்’’ (தனிப்பாடல்) “ அமையொடு வேய்கலாம் வெற்ப’’ (பழ.357) “ தந்தப்பல் லக்குஞ் சிவிகையுந் தாங்கி’’ (தொண்டை- சத.87 ) “ கொடுந்தாள் முதலையும் இடங்கருங் கராமும்’’ (குறிஞ்சிப்.257) என்ற அடிகளில், ஒருபொருட் பலசொற்கள் வந்து வெவ்வேறு பொருள்நுட்பங் குறித்தல் காண்க. 1. பொருள் வகை பொருள் காட்சி கருத்து ஆகிய இரண்டற்கும் பொதுவான பொருள்; பண்டம் கட்புலனானதும் கனவடிவுள்ளதுமான உயிரற்ற பொருள்; சரக்கு காய்ந்த பொருள்; தாரம் இயற்கை விளைபொருள்; ஆக்கம் செயற்கை விளைபொருள்; செய்பொருள் கையாற் செய்யப்படும் பொருள்; உரு கன வடிவப் பொருள்; உருவம் பெருங் கனவடிவப் பொருள்; உருப்படி தனிப்பட்டதும் உயிரற்றதும் ஒன்றன்படியுமான கனவடிவுப்பொருள் (article); உடைமை உடம்பிலுள்ள ஆடையணிப்பொருள்; மதி அளவிடப்பட்டு வரி 1. இவ்வுண்மையை - ‘Synonyms Discriminated’, ‘Words confused and Missued’ முதலிய ஆங்கில நூல்களுட் காண்க. |