தமிழ் இணையக் கல்விக்கழகம்

வழுநிலை, வழாநிலை

தொடர்களில் திணை, பால், இடம், காலம், மரபு ஆகியவற்றில் பிழை இருப்பது ‘வழுநிலை’. பிழை நீக்கி எழுதுவது ‘வழாநிலை’.


அப்பா வந்தது	நிலா சிரித்தான்

அவள் நடந்தேன்	கமல் நேற்று வருவேன் என்றான்

நாய் கத்துகிறது

குழலி	:	இனியா! அங்கே தெரியும் படங்களின் கீழுள்ள தொடர்களைப் பார். ஏதோ பிழை இருப்பது போலத் தெரிகிறதல்லவா?
இனியா	:	ஏதோ இல்லை குழலி. அனைத்துத் தொடர்களுமே பிழையாக உள்ளன.
குழலி	:	அப்படியா? முதலில் உள்ள படத்தில் அப்பா வந்தது என உள்ளது.
இனியா	:	அதிலுள்ளது திணை வழு. அப்பா வந்தார் என்பதே சரியானது.
குழலி	:	இனியா! இரண்டாம் தொடர் எப்படி வரவேண்டும் என எனக்குத் தெரியும். நிலா சிரித்தான் என்பது, நிலா சிரித்தாள் என வரவேண்டும். ஆனால் அது என்ன பிழை?
இனியா	:	பெண்பாலுக்கு ஆண்பால் வினைமுற்று இடம்பெற்றுள்ளது. அது பால் வழு குழலி. மூன்றாம் தொடர் அவள் நடந்தேன் என உள்ளதைப் பார்.
குழலி	:	ஆம். அதை ….
இனியா	:	அவள் நடந்தாள் எனக் கூறவேண்டும். அதனை இடவழு என்பர்.
குழலி	:	நான்காம் தொடரான கமல் நேற்று வருவேன் என்றான் என்பதை, கமல் நேற்று வந்தேன் என்றான் என்று கூறியிருக்க வேண்டுமல்லவா?
இனியா	:	ஆம். மிகச் சரியாகச் சொன்னாய் குழலி. அத்தொடரில் இடம்பெற்றிருப்பது கால வழு என்பர். இறுதித் தொடர் ….
குழலி	:	நாய் கத்தியது என்பது சரிதானே? அதில் என்ன பிழை?
இனியா	:	நாய் கத்தாது குழலி. அது மரபு வழு. நாய் குரைக்கும் என்பதே சரியானது.