”இயற்கைத் தாத்தா” என்று அனைவராலும் அன்புடன் அழைக்கப்படுபவர், நம்மாழ்வார். இவர், தமிழ்நாட்டிலுள்ள தஞ்சாவூர் மாவட்டத்தில் பிறந்தார். இயற்கையின்மீது மிகுந்த ஈடுபாடு கொண்டிருந்தார். வேளாண்மையில் இயற்கை முறைக்கு முதன்மை அளித்தார். இந்திய மரபுவிதைகளை மீட்டெடுத்து, மீண்டும் பயன்பாட்டுக்குக் கொண்டு வந்தார். வேம்பு, மஞ்சள் உள்ளிட்ட மருத்துவப் பொருள்களுக்குக் காப்புரிமை பெற்றுக்கொடுத்தார். குடும்பம், லிசா, வானகம் போன்ற சூழலியல் அமைப்புகளை உருவாக்கினார். இயற்கை, மரபு விவசாயம் பற்றிய விழிப்புணர்வை மக்களிடையே ஏற்படுத்தினார். இவர், சுற்றுச்சூழல், வேளாண்மை தொடர்பாகப் பல நூல்களை எழுதியுள்ளார்.

கென்ய நாட்டைச் சேர்ந்தவர், வான்காரி மாத்தாய். இவர், ”பசுமைப் பட்டை” இயக்கத்தைத் தொடங்கி, ஆப்பிரிக்கக் காடுகளை மீட்டெடுத்தார். இவரை ’மரங்களின் தாய்’ என அழைத்தனர். காடுகள் அழிப்பினால் ஏற்பட்ட வறுமையை ஒழிக்க, ஓர் அமைப்பைத் தொடங்கினார். பெண்களின் உதவியுடன் முப்பது ஆண்டில், மூன்றுகோடி மரம் நட்டுள்ளார். சுற்றுச்சூழலை மேம்படுத்துவதையே தம் வாழ்வின் குறிக்கோளாகக் கொண்டார். நோபல் பரிசு பெற்ற முதல் ஆப்பிரிக்கப் பெண் இவரே ஆவார்.

அமெரிக்கக் கடல் உயிரியலாளர்; எழுத்தாளர்; சூழலியலாளர் எனப் பன்முகம் கொண்டவர், ரேச்சல் லூயிஸ் கார்சன். இவர் எழுதிய ‘மெளன வசந்தம்’ என்னும் நூல் மிகவும் புகழ்பெற்றது. இந்நூல், அமெரிக்காவின் தேசிய பூச்சிக்கொல்லிக் கொள்கையில் மாற்றத்தை ஏற்படுத்தியது. ஏராளமான மக்களைச் சுற்றுச்சூழல் பாதுகாவலர்களாக மாற்றிய பெருமை இந்நூலுக்கு உண்டு. இந்நூல் பூச்சிக்கொல்லி வேதிப் பொருள்களுக்குத் தடைவிதிக்க வழிவகுத்தது. இவர் பல நூல்களை எழுதியுள்ளார். Under the Sea Wind , The Sea Around Us, The Edge of the Sea என்னும் நூல்கள் கடற்கரையிலிருந்து கடலின் ஆழம்வரை வாழும் உயிரினங்கள் பற்றிய விரிவான ஆய்வு நூல்களாகும். இவருக்கு அமெரிக்காவின் ’சுதந்திர விருது’ வழங்கப்பட்டுள்ளது.

ஷிகோகு என்ற ஜப்பானியத் தீவைச் சேர்ந்தவர், மசானபு ஃபுகோகா. பழங்குடியினரின் வேளாண் முறையை வலியுறுத்திய இவர், இயற்கை வேளாண்மைக்கு இயந்திரங்கள், வேதியியல் பொருள்கள் முதலியன தேவையில்லை என்றார்.

இந்த வேளாண்முறைக்கு “இயற்கை உழவு முறை” எனப் பெயரிட்டார். இவர் எழுதிய ‘ஒற்றை வைக்கோல் புரட்சி’ என்னும் நூல் உலகப் புகழ்பெற்றது. இவருக்கு ஆசியாவின் நோபல் பரிசான ’இராமன் மகசேசே விருது’ , ’பூமிசபை விருது’ ஆகியன வழங்கப்பட்டுள்ளன.