பல்வேறு நோய்களைக் குணப்படுத்துபவர்கள் மருத்துவர்கள். அவர்களுக்கு ஒப்பாக, பசிப்பிணி நீக்குபவர்களையும் மருத்துவர்கள் என்று கூறிய செய்தி வியப்பிற்குரியது. சங்க இலக்கியமான புறநானூற்றுப் பாடலில் (173) ‘பண்ணன்‘ என்ற நிலக்கிழான், ‘பசிப்பிணி மருத்துவன்‘ என்று பாராட்டப்பட்டான். பசியுடனும், நெடுந்தூரம் நடந்ததால் உண்டான களைப்புடனும் வந்த பாணர்கள், ‘பசி’ என்னும் நோய் தீர்க்கும் மருத்துவனாகிய பண்ணனின் இல்லம் பக்கமா..? தூரமா..? என்று கேட்டதாக அப்பாடல் கூறுகிறது. பசியையும் ஒரு நோயாக உருவகம் செய்து, அதனைத் தீர்க்கும் புரவலனை ’மருத்துவன்’ என்று பாணர்கள் அழைத்துள்ளமை சிந்திக்கத்தக்கது.