தலைமகன் முதலோர் தலைமகளின் பெற்றோர் மாட்டு மணம் பேசி வரல்.

தோழி பருவங்காட்டித் தலைமகளை வற்புறுத்தியது

மென்முலைமே லூர்ந்த பசலைமற் றென்னாங்கோ
னன்னுதன் மாதராய்! ஈதோ நமர்வருவர்
பன்னிற முல்லை யரும்பப் பருவஞ்செய்
தின்னிறங் கொண்டதிக் கார்.

(பத.) நல் நுதல் - நல்ல நெற்றியினையுடைய, மாதராய் - அழகிய பெருமாட்டியே! இ கார் - இக்கார் காலத்தே தோன்றிய இம்முகிலானது, பல் நிறம் - நம்பற்களின் வெண்ணிறத்தினையுடைய, முல்லை - முல்லை மொட்டுக்களை, அரும்ப - (முல்லைச் செடிகள்) தோற்றுவிக்கும்படி, பருவம் செய்து - கார்ப் பருவத்தினைத் தோற்றுவித்து, இன் நிறம் - கண்டார்க்கினிய காட்சியாகிய நீல நிறத்தினை, கொண்டது - மேற்கொண்டு விளங்கா நின்றது (ஆகலின்), நமர் - நம்மவராகிய தலைமகனார், ஈதோ - இப்பொழுதே, வருவர் - வந்து சேர்வர், (அங்ஙன மவர் வரின்,) மெல் முலை மேல் - மெல்லிய முலைகளிடத்தே, ஊர்ந்த - (அவர் பிரிவாலுண்டாகி) யமர்ந்த, பசலை - பசப்பு நிறமானது, என் ஆம்கொல் - (இனி நம்மை) யாது செய்யவல்லது? (எதுவும் செய்யவியலாது; துன்புறா திருப்பாயாக, என்று தோழி தலைமகளிடங் கூறினாள்.)

(ப-ரை.) நின்னுடைய மெல்லிய முலைமேலேறிய பசலை நிறம் என்னாங் கொல்லோ? நன்னுதலையுடைய மாதராய்! நமர் ஈதோ வருவர்: பற்போன்றிருந்த நிறத்தையுடைய முல்லைகள் தாம் முகையரும்பப் பருவத்தைச் செய்து கண்டார்க்கினிய நிறத்தைக் கொண்டது இக்கார்.

(விரி.) கார் தோன்றியமையின், அக் கார்காலத்தே வருவதாக உறுதிமொழியுரைத்துச் சென்ற தலைமகனாரும் அத்தோற்றத்தினை யொப்பப் தோன்றுவர் என்பது தோழியின் கருத்து. மற்று: அசைநிலை. வற்புறுத்தல் - தலைமகன் வரவுக்குரிய வேதுக்களை எடுத்துக் காட்டி, வருத்தமுறாதிருக்கும்படி கட்டாயப் படுத்திக்கூறல்.