(விரி.) தலைமகளின் இன்சொல் எக்காலும் தோழியின் நினைவகத்தே நிற்பது சிறப்பாமாகலின், ‘அறிவு,’ என்பதற்கு ‘எனது அறிவின்கண்,’ எனக் கண்ணழிக்கப்பட்டது. அல்ல குறி அடிக்கடி மிகுதியாக, ஏற்பட்டுத் தோழியினைப் பன்முறை ஏமாற்றியதாகலின், “செறிவறா செய்தகுறி,” எனலாயினள். நிமிர்தல் - உயர்தல், நீண்டு போதல்.

தலைமகனைக் கண்ணுற்று நின்ற தோழி வரைவு கடாயது

இனமீ னிருங்கழி யோத முலாவ
மணிநீர் பரக்குந் துறைவ! தகுமோ
குணநீர்மை குன்றாக் கொடியன்னாள் பக்க
நினைநீர்மை யில்லா வொழிவு.

(பத.) இனம் மீன் - மீன் கூட்டங்களையுடைய, இரும் - பெரிய, சுழி - கடற் கால்வாயினிடத்தே, ஓதம் - அலைகள், உலாவ - வந்து திரிய, மணி - நீலமணிபோன்ற, நீர் - கடனீரானது, பரக்கும் - பரவிச் செல்லும்படியான, துறைவ - துறைமுகத்திற்குரிய தலைவனே! குணம் - நற்குணங்களாகிய, நீர்மை - தன்மை, குன்றா - குறைவு படாத, கொடி அன்னாள் - பூங்கொடி போன்ற தலைமகளின், பக்கம் - இடத்தே, நினை - (மணவினையினை) எண்ணிப் பார்க்கும்படியான, நீர்மை - தன்மையானது, இல்லா - ஏற்படாது, ஒழிவு - நீங்கியிருத்தல், தகுமோ - நினக்குத் தக்கதாமோ ? (என்று தோழி தலைமகனிடம் வினாவினாள்.)

(ப-ரை.) இனமீன்களையுடைய இருங்கழியின்கண்ணே வந்து ஓதங்களுலாவ நீலமணிபோன்ற நீர்பரக்குந் துறைவனே! தகுவதொன்றோ குணத்தன்மை குன்றாக் கொடியன்னாள் திறத்து நினையு நீர்மையின்றி யொழிதல் நினக்கு ?

(விரி.) நினைநீர்மை : வினைத்தொகை. இல்லா : ஈறுகெட்ட எதிர்மறை வினையெச்சம். அருமை செய்து அயர்த்த தலைமகனைக் கண்ணுற்ற தோழி அவன் வரைதலை வேண்டிக் கூறியதாகுமிது. இதனை நச்சினார்க்கினியர், “காதன் மிகுதி உளப்படக் களனும் பொழுதும் வரைநிலை விலக்கி வரைந்தருள வேண்டுமெனத் தோழி வரைவுகடாய” தென்பர் (தொல். கள. 23)