உன்னுக. இவற்றின் மேல் இரண்டு பாட்டுக்களும் (630 - 631) அவ்வாறே
மெல்லோசைச் சந்தத்தில் யாத்தது இருபக்கத்துப் படைஞர் பலர்
இறந்தொழிந்து மெலிந்த நிலைகுறிக்க என்க. அதன்மேல் தலைவராகிய
நாயனார் போர் தொடங்குதலின் உயர்நடைபெற் றொழுகும் தரவு
கொச்சகக் கலிப்பாவாகிய வேறு யாப்பினாற் கூறும் யாப்பமைதியும்
நோக்குக. 21

     (இ-ள்.) பொற்சிலை...வழங்கினர் - பொற்பூணிட்ட தமது விற்களை
வளைத்துப் போர் செய்தாரில் புற்றினின்று கிளம்பும் அரவு போல மாற்றார்
விட்ட அம்பினால் தமது விற்படை அறுபட்டொழியவும் போர் ஒழிந்து
நிற்காதவர்களாகிய, வெற்றி தரும் உடைவாளை உருவிப் போரிட்டனராகிய
இவர்கள்; முற்றிய ... பண்பினர் - முன்னர் நிறைந்திருந்த தமது
பெருவளங்கள் ஒழிந்த பின்னரும் முன்னைக் கொடை நிலையிலே நிற்கத்
தம்மிடம் எஞ்சி உள்ளனவற்றை உதவுகின்ற வள்ளற்றன்மையுடையாரை;
ஒத்தனர் உளர் சில கண்டகர் - ஒத்தாராகி உள்ளார் சில வீரர்கள்.

     (வி-ரை.) பொற்சிலை - பொற்பூணிட்டவில். போர் மள்ளர்களும்
ஏனைத் தொழிலாளர்களும் தத்தம் தொழிற்குரிய கருவிகளுக்குப் பொற்பூண்
முதலியன இட்டுப் பாராட்டிக்கொள்ளுதல் மரபு. இவை அக்கருவிகளுக்குப்
பலமும் உறுதியுந் தருவனவுமாம். பொன் - அழகிய என்பாருமுண்டு.

     சிலைவளைய எதிர்ந்தவர் - விற்படை மள்ளராய் எதிர்த்துப்
போரிட்டார். வளைய என்பது அதற்கு உரிய போர்த்தொழில் குறித்தது.

     புற்று அரவு அனைய சரம் - அம்பறாத்தூணி (புட்டில்) புற்றாகவும்,
அதினின்றும் ஒன்றன்பின் ஒன்றாக இடைவிடாது தொடர்ந்து வரும் சரங்கள்
அரவாகவும் உவமித்தார். இறத்தலைத்தரும் தொழிலாலும் அரவுக்குவமையாம்.
விடமூட்டிய அம்புகள் என்பதுமாம்.

     பட - பட்டமையால். துணியவும் - துணிக்கப்பட்டு அற்றுப்போயின
பின்னரும். நின்றிலர் - போர் செய்யாது நின்றாரில்லை.

     வெற்றிகொள் - வெற்றியைத் தன்னதாகக் கொள்கின்ற.

     வழங்கினர் - போரிற் பயன்படுத்தினர்.

     முற்படு கொடை நிலை - முற்படு - பெருவளன் இல்லாமற்
போயின காலத்தின் முன் தம்மிடத்துப்பட்ட. கொடைநிலை -
பெருங்கொடையாகிய தன்மை. நின்றிட - அத்தன்மை ஒழியாது தங்க.
நிலைநின்றிட என்று கூட்டிக்கொடையானது அறாமல் நிலைக்க என்றலுமாம்.
கொடைநிலை நின்றிட - கொடை நிலை செல்லாது நின்று பட்டதாக
என்பாருமுண்டு. உற்றன - அப்போதைக்குத் தம் கைக்கு உதவியன -
கிடைத்தன.

     பண்பினர் - தன்மையுடையாரை, இரண்டனுருபு தொக்கது,
பண்பினரை ஒத்தனர் என்க. எதிர்ந்தவரில் - நின்றிலராகி - வழங்கினார்கள்
- பண்பினரை - சில கண்டகர் - ஒத்தனர் - என்று கூட்டி முடித்துக்
கொள்க.

     கண்டகர் - வன்கண்மையுடைய போர். வீரர்கள்,

     கண்டர்கள் - என்பதும் பாடம். 22